InfoHub Logo

Jańǵaqtyń oıy, Shaǵadam, Nebıttaý qalalarynyń tóńiregi qashannan adaı qazaq pen jáýmit túrikmenniń aýyly aralas, qoıy qoralas qonysy. Gúrji, Erikti, Oǵylandy sıaqty kishigirim eldi mekenderdi ataǵanda keńshar men aýyldyq keńestiń ortalyǵy — Aqquıy aýylynyń shoqtyǵy bıik. Sondyqtan jýrnalısik issaparmen oǵan barǵan kezderimiz az bolmaǵan. Alǵash barǵanymda aýyldyq keńes tóraǵasy Babanıaz Mollaevqa jolyqtym, qonaq úıi ne ashanasy joq aýylda qaıda bararsyń, ol úıine ertip bardy. Úı ishi jatsynbaı qarsy alyp, syı-qurmetin kórsetip jatyr. Ásirese, anasy aqjarqyn kisi eken, aty-jónime deıin surap, báıek boldy. "Men de qazaqtar sıaqty sút qatqan úndi shaıyn ishemin, túrikmenniń kók shaıyn qalamaımyn", — deıdi kúlip. Bir kún túnep erteńine qalaǵa qaıtyp kettim.

Araǵa aı salyp taǵy sol Aqquıyǵa jolym tústi. Bul saparǵy sharýam keńsharda bolǵandyqtan keńshar keńsesinde bolyp, dırektory Amansúıin Soltanmámedovpen áńgimelestim. Jumysym bitken soń elge qaıtýǵa kólik joq, amalsyz erteńge qaldym. Túski shaıdy Amansúıinniń úıinen iship, tús qaıta aýyldyq keńestiń keńsesine bardym. Oıymda eshteńe joq, ańqyldap kirip barsam, áneýgúni birge bolǵan Oraz Mollaevym ernin ǵana jybyrlatyp, qyryn qaraıdy. Men onyń qylyǵyn túsine almaı dal bolyp, "ne jazdym" kúıge tústim. Muny Amansúıinge aıtqanymda, ol kúldi. "Siz bizdiń ǵurpymyzdy bilmeıdi ekensiz. Bizde qonaq bir kelip túsken úıin sol aýylǵa ekinshi kelgende attap kete almaıdy. Qonaqtyń ol úıge ekinshi kelmeýin túrikmender elemeýshilik, álgi úıdiń meıman kóńilin tappaǵany dep uǵynady. Sondyqtan Babanıazdyń ókpesi oryndy. Eger basqa úıge barǵyń kelgen jaǵdaıda da óziń alǵash qonaq bolǵan úıge túsip, úı ıesine túsindirip, ruqsatyn alýyń kerek. Olaı jasamasań, qonaǵymyz renjip, álde ókpelep ketken eken deıdi", — dedi ol. Men túrikmenderdiń mundaı ǵurpyn bilmeıtinimdi aıttym.

Keshke qaraı " Bizdiń bir zootehnıgimiz kelin túsirip, toı jasap jatyr. Baryp shyqsaq qaıtedi?", — dedi Amansúıin. Aýlasy bar, eńseli úıge kirgenimizde keń dastarhan basynda qatarlasa otyrǵan jas-kári syılap oryn berdi. Dastarhan ústi ár túrli taǵamǵa toly, biraq ishimdik jaǵy kórinbeıdi. Bul araq-sharapsyz toıdyń sáni kirmeıtin, jurt jappaı ishýdi modaǵa aınaldyrǵan kez edi. Taǵamdardy aýys tıdik, jurt máz-máıram. As qaıyrylǵan soń syrtqa shyqtyq.

"Táke, esińizde bolsyn biz úlkenderdiń, shal-kempirdiń aldynda ishimdik ishpeımiz. Basshylar, azdap urttaıtyndar bólek úıge baryp, kórinbeı ishedi",— dedi Amansúıin.

Túrikmenmen irgelespiz, salt-dástúrin bilemiz degenmen bul halyqtyń biz bilmeıtin qyr-syry kóp ekenin sonda bildim.

---