InfoHub Logo

Jetpisinshi jyldardyń bel ortasy. Túrikmenstannyń Krasnovodsk aýdandyq gazetinde qyzmet istep júrgen kez edi. Birde aýdandyq partıa komıtetinen "Jebel" keńsharynda qurylǵan komsomol-jastar shopan brıgadasy jaıynda maqala jazý qajet degen nusqaý tústi. Ortalyqtan úsh júz shaqyrymdaı jerdegi sharýashylyqqa qonaǵa jettim. Qazaǵynan túrikmeni kóp keńshardyń basshysy Ásen Nazarov degen túrikmen edi. Jastar brıgadasyna ózi ertip aparatyn boldy. Erteńine erteletip jolǵa shyqtyq.

Dalanyń oıly-qyrly jolymen ilbip jetemiz dep júrgende kún arqan boıy kóterilip qaldy. Dóńge kóterile qıalaı qulaǵanymyzda shópten salynǵan bastyrmaly qaranyń tóbesinen tústik. Taıap kelip toqtaǵanymyzda qora toly qoı mańyrap qoıa berdi. Áli óriske shyqpaǵan eken. Muny kórgen Ásen aǵaı ashýdan tútigip ketti. Jyldamdata baryp qoranyń esigin ashty. Sol-aq eken ashqursaq mal lap qoıdy. Toqty otary eken birin-biri bastyrmalap qulap jatyr.

Qyrdan kóktem ısi ańqıdy. Qyrat-belder kókpeńbek. Mundaıda mal shydar ma, kók qýyp bezip barady.

— Áı, júgirmek ıtter-aı, bular qaıda júr, maldy tal túske deıin qamap, — degen Ásen qora irgesindegi shopandar úıshigine bardy da, esigin julqı ashty. Úı ishi astan-kesten. Temeki men araq ısi qolqa qabady. Jamylǵylary basyna ketip, sıraqtary qostıip aıqush-uıqysh jatqan tórt bozymbaı balań jigit birin-biri oıatyp álek.

Qatty ashýlanǵan bastyq olardyń jer-jebirine jetti. Qaıtar jolda Ásen de, men de únsizbiz. "Maqtaǵan qyzdyń..." kebin kıgen komsomol shopandar artta qaldy.

— Jańaǵy kórgenderińdi jazasyń ǵoı, — dedi Ásen kenet túıeden túskendeı.

— Árıne, — dedim.

— Osyny jazbaı-aq qoısań qaıtedi?..

— Nege men jazý úshin keldim ǵoı...

— Oı, Temeke, qaıtesiń sony, sirá orystyń maly ǵoı. Erteń-aq úkimet etke aıdaıdy, ıt bolyp azabyn kóretin biz daǵy.

Men oılanyp qaldym. Ańqyldaǵan aq kóńil azamat Ásen Nazarovtyń sózin jerge tastaı almadym. Maqala jazylmady, biraq onyń " orystyń maly" degeni esimde qaldy.

---