InfoHub Logo

— Táke, qudalaryńyz qaı jaqtan? — dedi kórshim Eleýsin. Ulym úılengeli jatyr degen habardy estigen bolýy kerek.

— Tarazdan...

— Oıboı, Táke-aý, jerdiń túbi ǵoı, alys eken, alys, — dedi basyn shaıqap.

— Bizben aqyldasa ma? Jastar ózderi tabysypty, baqytty bolsa, boldy.

— Árıne ǵoı, biraq, jaqyn jer bolǵany jaqsy ǵoı. Meniń ulym da bıyl Almatydaǵy oqýyn bitiredi. Biraq, Qudaı bar, olaı jasaı qoımas. Toqsanǵa kelgen naǵashy atasy da: "Osy tóńirektiń ǵana qyzyna úılenesiń", — dep qaıta-kaıta tapsyryp qoıady. Basy bar bala, olaı jasaı qoımas...

Men ne aıtaıyn, úndemedim. Arada bir jyldaı ýaqyt óte shyqty. Eleýsinniń úıi abyń-kúbiń. "Uly úılenedi eken" degendi estigenmin. Keshqurym syrtta Eleýsin kezdese ketti.

— Al, Eleke, ulyńyz úılengeli jatqan kórinedi, oń bolsyn!

— Rahmet, Táke!

— Kelin qaı jerden edi?

— Almatydan...

Esime onyń byltyrǵy, Tarazdy alyssynyp aıtqan sózderi tústi de:

— Oı, Eleke, alys emes pe? — dedim.

Onyń esine de baıaǵysy tústi-aý deımin, maǵan jalt qarady da, qyzaraqtap:

— Baldar solaı uıǵarypty, — dedi.

— Almaty alys qoı. Eleke, endi úlken kisilerińiz bar, balaǵa túsindirip aıtpady ma? — dedim.

— Aıtýyn aıtty ǵoı, biraq qazirgi baldar tyńdaı ma? — dep, ol sharasyzdyǵyn bildirip eki alaqanyn jaıdy.

Onysy ras jáne ony túsinemiz de. Biraq, "kúlme dosyńa, keler basyńa" degen halyq danalyǵyn keıde eskere bermeıtinimiz bar...

---