InfoHub Logo

Djordj Leonard «Sheberlik» kitabynda maqsatqa jetip, kemeldený joldaryn qarastyrǵan. Kez-kelgen iste sheber bolǵysy keletin jandar úshin, atalǵan kitaptan birneshe paıdaly keńes usynamyz.

Qarsylasýǵa daıyn bolyńyz

Qarsylastyqtyń nendeı sebepti týyndaıtynyn eshqashan naqty bile almaısyz. Boıyńyzdaǵy úreı sebepti me? Álde psıhosomatıkalyq ahýalyńyz jazyqty ma? Múmkin jumystaǵy áriptesterińizdiń qasaqana jasaıtyn zalymdyqtarynan bolar? Otbasy múshelerimen, dostaryńyzben arańyzda týyndaǵan urys-keris she? Atalǵandardyń eshbirin baıqamadyńyz ba? Onda saq bolǵaısyz! Belgili bir ortada qalyptasqan tártipti buzǵanyńyz úshin, arqańyzdan pyshaq suǵýy múmkin.

Dostaryńyz, otbasyńyz nemese áriptesterińiz tarapynan qarsylastyq tabýyńyz yqtımal. Mysaly, biraz ýaqyt buryn tańerteń 7:30-da turý qıynǵa soqqanymen, saǵat 9:00-da bastalatyn jumysyńyzǵa úlgerýge bardy salasyz. Endigi, ózińizdi qolǵa alyp, kúndelikti saǵat 6:00-da uıqydan turyp, bes kılometr qashyqtyqta júgirip, 8:30-da deneńiz kúsh-qýatqa toly kúıde keńsege jetesiz.

Bálkim, sizdegi bul ózgeris sebepti áriptesterińiz bórkin aspanǵa atyp qýanady degen senimde bolarsyz. Jo-joq, mundaı bola qoımaıdy. Al tánińiz qýatqa toly kúıde úıge qaıtsańyz she? Mundaı ózgeris otbasyńyzǵa unaı ma eken? Múmkin.

Dese de mynany este ustaǵanyńyz jón: qalyptasqan júıeniń bir bólshegi ózgergende, júıeni tutastaı ózgertkenińiz jón. Sondyqtan janyńyzǵa jaqyn jandar sizdegi jaǵymdy ózgeristerge, kemeldikke talpynysyńyzǵa ashyq túrde qarsylyq tanytsa, esh tańdanýdyń qajeti joq.

Qoldaý júıesin quryńyz

Árıne, ómirińizge ózgerister engizýge ózińiz ǵana uıytqy bola alasyz. Alaıda qýanysh pen qaıǵyńyzdy bólise biletin jaqyn jandaryńyzdyń qoldaýyna súıený kemeldikke jeter jolyńyzdy jeńildetedi.

Qoldaýdyń eń jaqsy júıesi – dál osyndaı ózgeristerdi bastan keshken nemese ózgeris jolyna túsken adamdar. Janyńyzda ózindik hıkaıasymen, qıyndyqtarymen, jetistikterimen bólisip, sizdi túsine alatyn, taısaqtaı bastaǵanyńyzda baǵyt berip, qoldaý tanytatyn, shyńǵa órleýińizge qanat bitiretin jandar bolýy tıis.

Qýanyshymyzǵa oraı, kemeldikke bastar jol siz tańdaǵan ne basqa salada bıikke talpynǵan jandardy biriktiredi.

Turaqty túrde mashyqtanyńyz

Ómirin ózgertýge bet burǵan jandar turaqty túrde súıikti isimen aınalysý arqyly turaqtylyq, jaılylyq sezimine bólenedi. Ol jetistikke jetýge ǵana emes, kemeldený prosesiniń durys júrýine sebin tıgizedi.

Tájirıbe, mashyqtaný kemeldik jolynyń negizi bolǵandyqtan, olardyń bul jolǵa túsken adamǵa kómegi zor. Udaıy qandaı da bir iske mashyqtanýǵa daǵdylanǵanyńyzda, boıyńyzdan jaǵymdy ózgeristerdi ańǵarasyz. Osy kezde túbegeıli ózgeris qajettiligin, jańa jolmen baǵyt alýdyń mańyzdylyǵyn ońaı ári anyq túsinip, kózińiz jete túsedi.

Boıyńyzda kemeldikke baılanysty qalyptasqan ustanymdardy jumysyńyzda nemese mańyzdy qarym-qatynasta ustaný ońaı soǵady. Tipti, ol ustanymdar kúndelikti tańerteńgilik júgirýmen shektelse de, siz úshin onyń máni zor. Qandaı da bir áreketke daǵdylaný túptep kelgende ádetke aınalady.

Ómirińizdi oqýǵa arnańyz

Nege ekeni belgisiz, alaıda biz – oqýdyń jańa bilimdi meńgerý prosesinen anaǵurlym mańyzdy ekendigin esten shyǵarýǵa beıimbiz. Oqý degenimiz – ózgerý.

Fızıkalyq nemese aqyl-parasat, rýhanı turǵydaǵy kemeldikke jetý, áıteýir, qandaı maqsatta bolmasyn, oqý – tulǵanyń túbegeıli ári qarqyndy ózgerýi. Bul proses kolej ne ýnıversıtette alǵan bilimmen, qyryq, alpys nemese seksen jasqa jetýmen shektelmeýi tıis.

Ómir boıy oqý – kemeldikke umtylǵan adamdardyń erekshe teorıasy, erekshe aýmaǵy. Ondaǵy jol esh ýaqytta bitpek emes.

Oqýǵa keńes beremiz:

Oqyp-úırenýdi ádetke qalaı aınaldyrýǵa bolady

Maqsatyńa jetý úshin ózińe qalaı kedergi keltirmeýge bolady

Birden iske kirisýdi ádetke aınaldyrýdyń 7 ádisi

Motıvasıa, maqsat jáne jetistik

Baqytqa bólenýdiń jáne árdaıym baqytty bolýdyń joldary

---