InfoHub Logo

Ómir bir aq ret beriledi. Bizder, ıaǵnı adamzat balasy – sol ómirdi «bastan ótkerýshilermiz». Adamzatty Jaratýshy – bir Alla. «İńgáláp»  jaryq dúnıe esigin ashpaı jatyp toǵyz aı, toǵyz kún Ana qursaǵyndaǵy damý kezinen bastap biz armandaımyz. Neni? Mynaý jalǵan tirshilikke tezirek enýdi. Sol sıaqty dúnıe tabaldyryǵyn attap, eseıgennen keıin de sol ómirdi qalaı baqytty, laıyqty ári ádemi ótkizsem bolady deımiz. Jalpy armanǵa jetken kúnde de armannyń sharyqtaý shyńy kórinbeıdi. Sebebi armandaýǵa yqpal kóp-aq. Mine, demek biz armandaý úshin jaratyldyq. Alla bizge armandaý, qıaldaý múmkindigin jasap berdi. Bul bir serpimdilik ákeletin, kúsh-qýatyńdy tasytatyn, ózińe degen, ózgeniń saǵan degen senimin arttyratyn tamasha sezim. Biraq tek armandaý arqyly óz degenińe jetetindigińe eshkim de kepildik bere almaıdy. Sondyqtan armanyńdy júzege asyrý úshin kelesi kezeńge ótý shart. Bul kezeń – maqsat. Árbir jan neǵurlym bıik, aıqyn maqsattar qoıa bilse, shyǵar tuǵyry da soǵurlym bıik, aıqyn bolmaq. Osylaı maqsatymyzdy naqtylaǵannan keıin sol maqsatty negizge ala otyryp júıeli jospar quramyz. Ia, bul barlyǵy jospar boıynsha júredi degen sóz emes. Árıne, bári de bir Allanyń qalaýymen bolmaq. Biraq eger de seniń arman-nıetiń, yntań sol josparyńmen, jáne kelesi kezeńge jatqyzylatyn eńbegińmen, naqty is-áreketterińmen ushtasyp jatsa nege degenińe qol jetkizbeske? Ne oılasaq ta, ne qylsaq ta, bastysy, shyn júrekpen bolýy haq. Júrekten shyqqan – júrekke jetedi. Tabysqa jeteler oı-qıalymyz, arman-maqsatymyz, eren eńbekterimiz kóp bolǵaı! Ardaqtaıyq, aıanbaıyq, armanymyzdy aıalaıyq!..

Qudıar  Danıarov

---