InfoHub Logo

Tańy aq jıde, qara shalbar, aldyna fartýk baılaýdan bastalatyn daıashynyń bir kúndik ómiri qarbalysqa toly. Azannan qara keshke deıin zyryldap júgirý, tapsyrys qabyldaý, kelgen meımannyń kóńiline qaraý, ydys-aıaq jınap, dastarhan jaıý bul ońaı jumys emes ekeni anyq. Bir qaraǵanda daıashy bolyp jumys isteý ońaı sıaqty kórinedi. Alaıda ony jumys jasap jatyrǵanda qandaı mańdaı terimen bes teńgesin taýyp jatyrǵanyn baıqaısyń. Ádette meıramhana, kafelerde jumys jasaıtyn daıashylardyń deni stýdent jastar. Stýdentter qaýymy úshin bul taptyrmas jumys ispetti. Árıne, ol dıplomdy da, aqshany da kerek etpeıtindikten. Tek ydys kóterip júre alsań bolǵany qalǵanyn sol jerde júrip-aq úırenip alasyń. Men de bul daıashylyq ómirdiń dámin tatqanmyn. Úlkenderdiń kóńilin tabý, izetpen as usyný, jasy kishilerge ıile bilý «ońaı boldy, bárin úırenip aldym» dep aıta almaımyn. Bastapqyda meıman qabyldaý mádenıetin jetik bilmegenmin. Alaıda, ár meımannyń alǵysyna bólenip, olardy kúlip qarsy alyp kúlip shyǵaryp tastadym. Shydamdylyq tanytyp kúni-boıy otyrmastan eńbek etý, meımannyń kóńiline qaraý áste ońaı sharýa emes. Bul jumys ádette qýlyqty, jasandylyqty talap etetindeı. Ár tańyń árqalaı atatyndyqtaı kelgen qonaqtyń da bedeli ártúrli bolady. Biri qarapaıymdylyq tanytyp jibergen qatelikterińdi eskermese, biri salqynqandylyq tanytyp jatady. Sodan alatańnan bastalǵan jumysyńnyń quny 2000 teńgege tatyp, qara keshte bir-aq shyǵasyń. Al stýdentter qansha sharshap tursa da erteńgi kúnniń qamyn oılap, bal jınaý qamyna kirisedi. Sondyqtan stýdent daıashy bar jumysty atqaryp azyn-aýlaq aqshany mise tutatyn eń tózimdi halyq.

Aısáýle Ardaqqyzy

 

---