InfoHub Logo

Bizdiń elimiz – jas memleket. Táýelsizdik alǵanymyzǵa nebary 28-aq jyl boldy. Osy 28 jylda elimizdi basqaryp, onyń aıaǵynan nyq turýyna ózindik úlesin qosqan tuńǵysh Prezıdentimiz, Elbasymyz – Nursultan Ábishuly Nazarbaev týraly oı tolǵaýymdy jazý maqsatynda qolyma qalam aldym.

Ózi aýyldyq jerde dúnıege kelse de, el basqarý dárejesine deıin kóterile alǵan, elin kórkeıtken bul tulǵa týraly jazarym kóp.  Qarapaıym jumysker retinde eńbek jolyn bastaǵandyqtan bolar, Ábishuly Nazarbaev qarapaıym halyqty túsinip, halyqtyń oıymen sanasa bildi. «Kez kelgen memlekettiń qýaty  halqynda» degen sózderdi uran etti. Bir shańyraq astynda 130-dan asa ult pen ulys ókilderin syıǵyza aldy. Birligimizdi bizdiń qarýymyzǵa aınaldyrǵan birtýar azamattyń kóregendigine tań qalasyń. Bul kez-kelgen adamnyń qolynan kele bermes.

Elbasy bir suhbatynda: «Kóptegen elderdi araladym. Tabıǵaty ǵajaıyp talaı ólkeniń sulýlyǵyna kóz qumarymdy sýardym. Biraq, bári de ózim týyp-ósken qazaǵymnyń jerine, Alataýdyń bir bókterine jambastaı jyǵylǵan úsh qońyr tóbege jetpedi. Balalyǵymnyń, saǵynyshymnyń altyn qazyǵy sonda eken…»-dep edi. Bul Otan-anasyn, týǵan jerin janyndaı súıetin perzenttiń, naǵyz patrıottyń sózi. Halqymyz jyrlap ketken batyrlar dál osyndaı bolsa kerek. Elim dep, jerim dep kúresken atom bombasy syndy zulym kúshti jeńgen batyrdaı elesteımin men ony.

Tý tigip, táýelsiz bolǵanymen is bitpeıtinin túsingendikten bolar, tuńǵysh Prezıdentimiz táýelsizdikti saqtap qalý úshin zaman talabyna saı júrý kerek ekendigin asa bir kóregendikpen aıtyp ketti.  Rasynda da, eskini umytpaı, jańǵyrtý, zaman talabyna saı ózgere bilý, ózgerý kerek eken dep tamyrymyzdy joǵaltpaý qajet. Sondyqtan Nursultan Ábishuly «Rýhanı jańǵyrý» atty baǵdarlamasyn júzege asyrýdy qolǵa aldy. Bul baǵdarlama 6 baǵyttan qurylǵan: básekelestik qabilet, pragmatızm, ulttyq biregeılikti saqtaý, bilimniń saltanat qurýy, evolúsıalyq damý, sananyń ashyqtyǵy. «Rýhanı jańǵyrý» baǵdarlamasyn oqyǵan saıyn, tereńine úńilgen saıyn qara sózben halqyna ósıet qaldyrǵan Abaıdaı elesteımin men ony.

 Elbasy «Boı salystyratyn zaman emes, oı salystyratyn» degen ustanymdy ustanyp,  jastardy shet elge jiberdi, «Bolashaq» baǵdarlamasy aıasynda bilim alýyna jaǵdaı jasady. Bul baǵdarlamasyn iske asyrýyna kóz júgirte otyryp, qarańǵyda adasqan qazaq halqyn jaryqqa boı túzeýine jol ashqan  aǵartýshy Ybyraı Altynsarındaı elesteımin men ony.

Boıyna batyrlardyń kúshin jınaǵan, taǵylymymen Abaı men Ybyraıdaı úlgi bolǵan Nursultan Ábishuly Nazarbaevtyń eren eńbekteri eshqashan umytylmaq emes. Sondyqtan da bul tulǵa qazaqstandyqtar úshin árqashan birinshi bolyp qalady dep oıtolǵaýymdy aıaqtaǵym keledi.

---