InfoHub Logo

Jalǵyz qyzy bar bir baı men jalǵyz uly bar baı ekeýi quda bolady. «Eki jarty bir bútin bolsyn, sán-saltanaty kelisken tútin bolsyn! Bireýimiz kelinim demeıik, bireýimiz kúıeýim demeıik. Ekeýmizdiń ortamyzdaǵy, ekeýmizge ortaq otaý bolsyn», — dep kelisedi. Berik sóz baılasqan eki baıdyń besikte qudalyq sóıleskennen keıingi qarym-qatynasy kún ótken saıyn nyǵaıa beredi. Eki baı irgeles jaılap, irgeles qonyp, eki aýyldyń ortasyna dáneker bop tigiletin sándi otaý dy asyǵa kútedi. Qyz ben bala birge oınap, bite qaınasyp ósedi. Sábı júrek biriniń-birine qudalyq jolymen tańylǵanyn da sezbeıdi. Olar kúni erteńgi bir-birinen bólinbes bir bútin bolǵandyqtan emes, balalyq jeteleýimen oıyn qyzyǵyna erýmen de tatý ósedi. Ul er jetip, qyz boı jetkennen keıin aralary alystaı bastaıdy. Qolań shashty salıqaly qyz jigit júregin baýrap, júregine ot tastaǵanymen, qyz jigitti súımeıdi. Jigittiń eshtemege ıkemi joq dóreki qımyly, shóp basyp syndyrmaıtyn erinshektigi, dúńk minezi qyz sezimin aýlaqtata beredi. Biraq besikten quda bop, qysqa arqan, tar tusaý sap qoıǵanyn estigen jigitti qyzdyń jaqtyrtpaǵanymen sharýasy da bolmaıdy. «Otaý qamytshylyǵy bitip, toı daıyndyǵy ázir bol-sa, aq tósińdi aımalarmyn» deıdi de, júre beredi. Baı da qyz jaıyn estigende, «balalyqtyń áseri de» dep etegin jımaıdy. «Arýaq jolyn syılamaı, ata jolyn buzyp, aq basty ana men aq saqaldy ákeniń qolynan shyǵyp, qaıda barady deısiń» degen tujyrymǵa keledi. Óstip quda da tynysh, qudaǵı da tynysh jatqan bir kúni toı isteý qamytshylyǵy bitip, aq otaý ázir bolǵan kúni «qyz qashyp ketipti» degen sýyq habar dúńk ete túsedi. Baıdyń toǵyshar ulyn unatpaǵan qyz jylqyshy jigitke eredi de, taıyp turady.

Qashyp kele jatqan qyz ben jigit aýyldan alystaǵannan keıin butanyń arasyn panalaıdy. Osy kezde qyz jigitke óziniń syryn aıtady: «Dáýleti men áýleti saı, salýly tósek, tigýli úı daıyn baı balasynan nege qashtym? Onyń sebebi, ol — toǵyshar. Bir kún mal shetine shyǵyp kórgen joq, onyń qolynan keler de joq. Shoqpardaı úki taǵyp, kúmistegen belbeý býynyp, jorǵa minip jortqandy ǵana biledi. Sen eńbekke qushtarsyń, eńbektiń balyn jegen ómir — naǵyz  ómir. Ekinshiden, sen — sybyzǵyshysyń. Óner ólmeıdi. Sondyqtan seni súıdim. Osy júrisimizdi sybyzǵyǵa qosshy, asyqpaı tyńdaıyn», — deıdi. Jigit sybyzǵysyn tarta jóneledi, qyz boıy balqyp tyńdaıdy. «Qyz qashyp ketti» degen habardy estigennen keıin eki jaq birigip tus-tusqa qýǵynshy attandyrady. At sabyltyp, úzeńgi qaǵystyryp kele jatqan bir top qýǵynshy sybyzǵy daýsyn estıdi de, shilik ishinde saırandap otyrǵan qyz ben jigitti qolǵa túsiredi. Ashý kernegen top jigitti ólmeshi qyp sabap, sol jerge tastaıdy da, qyzdy óńgerip aýylǵa alyp keledi. Jigittiń qyz tilegi boıynsha tartqan kúıi «Qyz alyp qashqan» atanady. 

---