InfoHub Logo

Astananyń barlyq memlekettik balabaqshalarynda joldamalar elektrondyq júıe arqyly beriletin boldy. Bul týraly Astana qalasy Bilim basqarmasynyń baspasóz qyzmetinen habarlady.

«Búginde Astanada túrli úlgidegi 261 mektepke deıingi mekeme bar. Onda tárbıelenetin balalardyń jalpy sany - 48 154. Sonyń ishinde: memlekettik - 95, onda 27 193 bala qamtylǵan; vedimistik  - 2, onda 383 bala qamtylǵan; jekemenshik - 116, onda 14 854 bala qamtylǵan, 95 mekemede 8 949 orynǵa memlekettik bilim berý tapsyrysy ornalastyrylǵan; shaǵyn ortalyqtar - 48, onda 5 724 bala qamtylǵan», -delingen habarlamada.

1 qańtardaǵy jaǵdaı boıynsha, mektepke deıingi mekemeden oryn alý kezeginde 3-ten 6 jasqa deıingi 33 240 bala tirkelgen.

Kezekke kún saıyn 100-den astam bala qoıylady. Bala týý jáne kóshi-qon   kórsetkishteriniń joǵarylaýy esebinen mektepke deıingi jastaǵy balalardyń sany kóbeıdi. Máselen, mektepke deıingi jastaǵy balalardyń kontıngenti 2010 jylmen salystyrǵanda 7 ese artqan.

Astanada www.e.astana.kz portaly arqyly ótinish joldaý jáne kezekti qaraý múmkindigimen qatar, joldamalardy avtomatty túrde berý júıesi iske qosylǵan.

Oryndardy bólýge Bilim basqarmasy mamandary qatyspaıdy. Sondaı-aq josparly jınaqtaý jumystaryn kútpeı-aq, bosaǵan oryndarǵa jyldyń ishinde joldamany alýǵa bolady. Árbir ata-ana kez kelgen ýaqytta jeke kabınet arqyly júıege kire alady. Júıe joldamanyń berilýi týraly habarlamany avtomatty túrde sms jáne elektrondyq poshta arqyly joldaıdy, odan keıin ata-analar mektepke deıingi mekemege usyný úshin joldamany júkteı alady. 

10 sáýirden bastap Astananyń barlyq memlekettik balabaqshalaryna joldamalar elektrondyq túrde beriledi. Eger ótinish berýshilerdiń balalary 2015 jyly dúnıege kelse, olar úshin 10 sáýirden, tıisinshe 2014 - 12 sáýirden, 2013 - 18 sáýirden, 2012 - 21 sáýirden, 2011 - 25 sáýirden bastap memlekettik balabaqshaǵa joldamany alýǵa múmkindik bar.

Árbir týǵan jyl úshin memlekettik balabaqshalarǵa joldamalardyń berilýin kútý merzimi Paıdalanýshylarǵa eskertpe joldanǵan sátten bastap 15 jumys kúnin quraıdy. Sebebi ata-analarda elektrondyq qyzmetterdi alýda qıyndyqtar týyndaýy yqtımal: Internettegi aqaýlar, NCLayer baǵdarlamasyn ornatýdaǵy qıyndyqtar, elektrondy sandyq qoltańbanyń joqtyǵy, jeke kabınette baılanys málimetteriniń bolmaýy jáne t.b.

Standartqa sáıkes ata-ana qolyna alǵan joldamany berilgen kúnnen bastap 5 kún ishinde mektepke deıingi uıymǵa usynýy tıis.

Bıyl elordanyń memlekettik balabaqshalarynda 6310 oryn bosaıdy. Onyń barlyǵy qatań túrde tek kezekke sáıkes bólinedi: 1240-ci 2015 jyly týǵan balalarǵa, 2233-si 2014 jylǵy, 1340-y 2013 jylǵy, 1111-i 2012 jylǵy, 386-y 2011 jylǵy balalarǵa qarastyrylǵan.

Aıta ketý kerek, eger bala úsh jasqa tolyp, mektepke deıingi mekemege kezegi kelmese, onda ata-analar balany tórt jastan bastap qysqa ýaqyt bolatyn shaǵyn ortalyqtarǵa nemese bala úsh jasqa tolǵan kezde oryn bólinetin memlekettik tapsyrysy bar jekemenshik balabaqshalarǵa bere alady.

Elektrondyq joldamany alýdyń tolyq nusqamasymen Astana q. Bilim basqarmasynyń saıtynda http://bilim.astana.kz/ru/catalog/infografika «Infografıka» bóliminde tanysýǵa bolady.

Elbasy Nursultan Nazarbaevtyń bıylǵy  Qazaqstan halqyna arnalǵan Joldaýynda memleket-jekemenshik áriptestik aıasyn keńeıtý kásipkerlikti damytýǵa zor múmkindik beretini basa aıtylǵan. Onyń arqasynda 3-6 jastaǵy balalardy mektepke deıingi bilim berýmen 100 paıyz qamtýǵa jol ashylady.

Elordada 2016 jyly kásipkerlerdi tartý arqyly 44 jekemenshik balabaqsha ashyldy, onda 3949 orynǵa memlekettik bilim berý tapsyrysy ornalastyrylǵan; qoldanystaǵy memlekettik balabaqshalarda daıarlyq baǵdarlamasy bar 1360 orynǵa arnalǵan 23 shaǵyn ortalyq bar. Memlekettik-jekemenshik áriptestik aıasynda «Qazaqtelekom» AQ 2016 jyly 680 orynǵa shaqtalǵan 3 balabaqsha qoldanysqa berildi.

Balabaqshany balamaly tańdaýdyń múmkindigin usyný úshin jekemenshik balabaqshalarda ata-analardyń tólemaqysy 23 000 teńgeden 20 800 teńgege deıin tómendetildi. 

Búginde memlekettik-jekeshelik áriptestik aıasynda balabaqshalar boıynsha 1680 orynǵa shaqtalǵan 6 joba júzege asyrylýda.  Balabaqshalardyń qurylysy boıynsha jeke seriktesterdi anyqtaý konkýrsy ótkizildi. Olardyń qurylysy 2019 jyly aıaqtalady dep josparlanǵan.

2017 jylǵa deıin Memlekettik-jekeshelik áriptestik aıasynda ulttyq kompanıalarmen 720 orynǵa arnalǵan 3 balabaqshanyń qurylysy aıaqtalady.

---