InfoHub Logo

CareerCast saıtynyń komandasy AQSH-ta áıgili bolǵan eńbek jáne bos jumys oryndarynyń İT-naryǵyn saraptap, jumys berýshiler úshin mańyzdy jáne eńbek aqysy joǵary mamandyqtardyń tizimin jasap shyǵardy.  Mundaı úrdisterdiń bizge sál keshigip jetetinin eskere otyryp, İT-ındýstrıasyndaǵy eńbek naryǵyn ózgertýde baǵdar alý úshin jaqyn jyldary kóp suranysqa ıe bolatyn İT mamandyqtarynyń reıtıńin jarıalaımyz.

Bul reıtıńte baǵdarlamashylar, web-jasaýshylar, aqparattyq qaýipsizdik boıynsha mamandar, málimetterdi saraptaý jáne óńdeý boıynsha mamandar jáne birneshe mamandyqtar basty orynnan kórindi.

Web-jasaýshy

Eń kóp suranysqa ıe bolatyn mamandyq - web-jasaýshy (Web developer). Ol İT-ındýstrıaǵa qatysty basqa mamandyqtar ishinen birinshi oryn aldy. Eńbek aqysy sál azdaý bolǵanymen web- jasaýshylar qazirdiń ózinde İT-eńbek naryǵynda kóp suranysqa ıe.

Esepteý tehnıkasy salasynyń sarapshysy (Computer Systems Analyst)

Ekinshi orynǵa esepteý tehnıkasy salasynyń sarapshy mamandary laıyq boldy. Olardyń qyzmetine degen suranys 21%-ǵa artady. Óıtkeni, mıllondaǵan adamdar kompúterdi paıdalanyp, baǵdarlamalar jasap jatqan kezde týyndaǵan qıyndyqtardy túzetetin mamandar aýadaı qajet bolady.

Aqparattyq qaýipsizdik boıynsha sarapshy (Information Security Analyst)

Árbir kompúterde kóptegen málimetter saqtalǵan. Onyń ishinde jeke málimetter de, komersıalyq málimetter de bar. Kez-kelgen aqparattyń joǵalyp ketýi – kompanıa úshin, onyń basshylyǵy men qyzmetkerleri úshin úlken qıyndyq. Kompanıa komersıalyq qupıalarynan, ishki qujatnamalary men klıentter bazasynan aıyrylady. Bul jaǵdaı olar úshin úlken qarjylyq qıyndyq týdyryp, bedelderine syzat túsiredi. Sondyqtan, osy aqparattardyń barlyǵyn saqtap, ony qaýipsiz qorǵaı alatyn mamandar kún ótken saıyn kerek bola beredi. Boljam boıynsha buǵan suranys  18%-ǵa artady.

Baǵdarlamalyq qamtamasyz etýshi, baǵdarlamashylar (Software Engineer)

Bos oryn 17%-ǵa artady, al baǵdarlamashylarǵa barlyq jerde, barlyq kompanıada, barlyq qyzmet salasynda suranys joǵarlaıdy. Tek joǵarytehnologıalyq jáne İT-kompanıalarda ǵana emes, qyzmetkerleri tapsyrys berýshilermen jáne klıenttermen jumys isteýde arnaıy softtardy qajet etetin qarapaıym kompanıalarda da bul mamandyqqa suranys azaımaıdy.

Málimetterdi saraptaý jáne óńdeý boıynsha maman (Data Scientist)

Big Data-nyń damýy men áıgili bolýyna baılanysty, qurylymdalmaǵan málimettterdiń úlken kólemi, osylarmen jumys isteý qabileti eńbek naryǵynda óte kóp suranysqa ıe bolady. Bul mamandyqtar boıynsha bos oryndar sany arta beredi. Boljanǵan ósý – 16%.

Júıelik ákimshi (Network and computer systems administrator)

Bultty esepteýlerdiń keń taraýy kompanıalardyń az kompúter satyp alýyna ákep soǵady. Kompúterlik júıelerdi, baılanystardy ornata alatyn mamandarǵa degen suranys kemimeıdi, kerisinshe, 8%-ǵa artady.

---