InfoHub Logo

QR Bilim jáne ǵylym mınıstrligi Dúnıejúzilik Bankpen birge qazaqstandyq ǵalymdardy granttyq qarjylandyrý jobasyn qolǵa aldy, dep QazAqparat habarlaıdy.

2016 jyldyń 2 aqpanynda Qazaqstan Respýblıkasynyń Parlamenti «Ónimdi ınovasıalardy yntalandyrý» jobasy aıasynda Qazaqstan Respýblıkasy men Dúnıejúzilik Damý jáne Qaıta Qurý bankiniń arasynda jasalǵan qaryz alýǵa baılanysty kelisimdi ratıfıkasıalady.  

Búgin Astanada «Ónimdi ınovasıalardy yntalandyrý» jobasyn basqarý toby tóraǵasynyń orynbasary Murat Sartbaev atalmysh joba jaıynda aıtyp berdi.

Onyń aıtýynsha, granttyq jobaǵa 30 mıllıon AQSH dollary bólinip otyr. Baǵdarlama aıasynda 60-70 tehnologıalyq startap qurylady dep kútilýde. Sonymen qatar doktorant mamandardy shetelde tájirıbeden ótkizýge Dúnıejúzilik bank 10 mıllıon AQSH dollaryn bólip otyr. Al ınovasıalyq konsorsıýmdardy qarjylaı demeýge 35 mıllıon AQSH dollary kóleminde grant berilmek.

«Ónimdi ınovasıalardy yntalandyrý» jobasyn iske asyrý sheńberinde úsh granttyq baǵdarlama qolǵa alyndy. Olar: Aǵa ǵylymı qyzmetkerler toby jáne Kishi ǵylymı qyzmetkerler toby úshin grantttar baǵdarlamasy. Úshinshisi - konsorsıýmdardy damytý granttyq baǵdarlamasy. Ol óz kezeginde jyldyń sońynda bastalady. Byltyr Aǵa ǵylymı qyzmetkerler toby jáne Kishi ǵylymı qyzmetkerler toby úshin grantttar baǵdarlamasynyń birinshi kezeńi ótti. 451 ótinishten 33 joba qarjylandyrýǵa ıe boldy. Búgingi tańda olardyń birnesheýi júzege asyp otyr. Bıyl atalmysh baǵdarlama aıasynda 400-den astam ótinish keldi», - dedi ol.

Onyń sózinshe, Qazaqstan Úkimeti men Dúnıejúzilik Banktiń ortaq jobasy basty ulttyq ınovasıalyq júıeniń ınstıtýttarynyń áleýetin arttyrýǵa, ınovasıalyq jobalar men tehnologıalyq startaptardy qoldaý irikteý jáne naryqtyq tańdaý mezanızmin engizýge, sondaı-aq, jeke sektorlardy qatysýǵa yntalandyrýǵa baǵyttalǵan. 

Joba maqsaty - joǵary sapaly, memleket úshin asa mańyzdy zertteýlerdi yntalandyrý jáne tehnologıalardy komersıalandyrý.

Úmitkerlerdi irikteý jáne jobalardy baqylaý jumysyn Ǵylym jáne komersıalandyrý jónindegi Halyqaralyq  keńes júrgizetindigin atap ótken jón. Baǵdarlama qazaqstandyq ǵalymdar men konsorsıýmdardyń ǵylymı- zertteýler nátıjelerin komersıalandyrýǵa baǵyttalǵan.

«Granttyń kólemi Aǵa ǵylymı qyzmetkerler toby úshin 230 mln. teńgeden, Kishi ǵylymı qyzmetkerler toby úshin 180 mln. teńgeden aspaýy tıis. Biz tek zerthanalyq zertteýleri aıaqtalǵan jobalardy qarjylandyramyz. Sonymen qatar basymdyq ónerkásiptik zertteýlerge beriledi. Jobanyń sońǵy nátıjesi satylymǵa shyǵý, jeke menshik sektor ınvestısıalary nemese lısenzıalyq kelisimder jasasý arqyly 3-shi jyldyń sońyna qaraı kompanıany ózin-ózi qamtamasyz etýge jetkizý», - deıdi M. Sartbaev.

Jalpy, aıta ketken jón, Búkilálemdik bankta jobalardy qarjylandyrýdyń sátti tájirıbesi bar. 2011-2015 jyldar aralyǵynda 65 tehnologıalyq startap qarjylandyryldy. Olardyń ishinde 40 joba óz ónimderin naryqqa shyǵardy.

---