InfoHub Logo

Aǵymdaǵy  jyly elimizde kolejde oqıtyn stýdentter sany 105 myń adamǵa jetedi. Bul týraly  búgin Úkimettiń selektorlyq rejimdegi otyrysynda QR Bilim jáne ǵylym mınıstri Erlan Saǵadıev málim etti.

Saǵadıevtiń aıtýynsha, Bilim jáne ǵylym mınıstrligi Nátıjeli jumyspen qamtý jáne jappaı kásipkerlikti damytý baǵdarlamasy aıasynda tehnıkalyq jáne kásiptik kadrlardy daıyndaýmen aınalysýda.

«Ol bizdiń 9-11 synyptardy bıyl bitiretin jáne byltyrǵy jyldary bitirgen balalarǵa arnalǵan 2-3 jyldyq standart boıynsha kolejde ótetin baǵdarlamasy. Bizde jyl saıyn 85 myń bala kolejderge tússe, bıylǵy jyly qosymsha 20 myń bala osy joba arqyly kelip, 105 myńǵa jetemiz dep otyrmyz. Bizde jyl saıyn 20-25 myń bala kolejge, joǵary oqý oryndaryna túspeı, mamandyqsyz qalady. Osy joba sol balalarǵa arnalǵan. Bıyl qosymsha 4,3 mlrd. teńge bólinip,  jergilikti búdjetterge jiberildi», - dedi ol.

Onyń atap ótýinshe, oblystarda 825 mobıldi toptar quryldy.  Olar kadrlardy daıyndaýǵa adamdar tizimin jınaqtap otyr. Batys Qazaqstan oblysynan basqa ár oblysta bilim uıymdary jáne mamandyqtar tizbesin bekitý úshin óńirlik komısıalar quryldy. 360 tehnıkalyq jáne kásiptik  uıymdardyń tizbesi anyqtaldy. Jergilikti organdar boljamdyq usynys negizinde jumysshy kadrlar úshin kásipter tizbesin daıyndaýda.

«Oqytý baǵdarlamalary daıyn. Oblystyq kásipkerler palatasymen kelisip bekitildi. Osy baǵdarlama arqyly oqýǵa túsetin balalar shákirtaqymen, bir rettik ystyq tamaqpen jáne tegin jatyn orynmen qamtamasyz etiledi», - dedi mınıstr. 

---