InfoHub Logo

Maqsattyń atasy jylqy baǵady. Ony árdaıym kútip, baptaıdy. Kóktem, jaz, kúz jáne qys mezgilderinde atasy Maqsatty ózimen birge ertip, jylqylardy kórip qaıtady. Atasynyń attary onsha kóp emes.

— Qazirshe osy bes-altaýy jetedi, — deıdi atasy. — Jasyma saı. Bulardy baǵý, kútý, qaraý ońaı emes.

— Ata, men jasym  úlkeıgende sizge kómekshi bolamyn, — deıdi Maqsat. — Attardyń sanyn kóbeıtemin.

— Meniń nemerem óskende kásipker bolady. Ata-babasynyń kásibi — jylqyshy bolý ǵoı, — deıdi atasy da Maqsattyń basynan sıpap.

Maqsat balalyq balǵyn minezben basyn ızeı kúlimsireıdi.

— Ras, ata, men óz sózime berikpin. Attarǵa qaraǵandy, kútip, baptaǵandy jaqsy kóremin.

— Qaısy bir is bolsa da, janyń súıip berile jasasań, sonyń raqatyn kóresiń, balam, — dedi atasy at ústinde kele jatyp.

Atasy men nemeresi qyrqanyń ústinde jaıylyp jatqan attarǵa keldi. Aıǵyr men bıeleri jáne taılary men kulyndary qaryndary toıyp, bir úıir bolyp, bir-birine jaqyn tur eken. Atasy men Maqsatty kórgen bıeler kisineı jóneldi.

— Ata, attarymyz bizdi tanydy. Qarańyzshy, jatyrqamaı bizge kele jatqan qulyndardy, — dedi Maqsat.

— Janýarlar sezimtal ǵoı. Bárin de biledi. Sezedi. Tanıdy, — dedi atasy.

— Atty sen aıdaı ber, balam. Men jaıaý júreıin. Attardy úıge qaraı qaıyr. Qaıyrýǵa op-ońaı kónedi. Kún ystyqqa qalmasyn. Toıynypty. Kóleńkege aparalyq, — dedi atasy attan túsip.

Maqsat attardy úıge qaraı baǵyttady. Janýarlar Maqsattyń degenine lezde-aq kóndi. Bári de birinen soń biri jaı júrispen Maqsattyń aldyna tústi.

— Ata, — dedi Maqsat. — Meniń dosymnyń atasy keı-keıde keıigen sátterde «qaıyrýǵa kónbegen  jylqy ispettes» degen sózdi kóbirek aıtady. Ol ne degen sóz, ata?

— E-e, balam, aıtqan sózdi qulaqqa aspaǵan soń renjıdi. Óz betine laqqan jylqy da solaı. Tizgin tımegen, quryq ilinbegen at tarpań, asaý bolady. Aıtqanyńa kónbeıdi. Óziniń ıesin sharshatady. Bosqa aram ter etedi. Sodan soń qaıyrýǵa kónbegen janýar deıdi. Adam balasy da solaı. Sózge túsinbegen, ony uǵynbaǵan adam qaıyrýǵa kónbegen jylqymen birdeı.

Maqsat oıly júzben atasyna qarady.

— Sonda adam men jylqynyń áreketi, is-qımyldary ózara uqsas eken-aý, ata, — dedi ol.

— Árıne, — dedi atasy, — ata-babamyz jylqy asyraýdy ózine etene jaqyn etken. Ádemi, kórikti jandardy qulyn músheli dep, al alysyńdy jaqyn etetindikten, «At — erdiń qanaty» dep aıtqan.

Atasy nemeresiniń sózdiń mánisine nazar aýdarǵanyna razy boldy. Áli jas bolsa da, qolǵanat bola bastaǵan alǵashqy qadamyna shynaıy túrde shattandy.

---