InfoHub Logo

Qanattyń qýanyshynda shek joq. Erteń atasy ekeýi mal bazaryna barmaq. Atasynyń aıtýynsha, Qanatqa at satyp áperedi. Byltyrdan beri minip júrgen taıy — bıyl qunan. Áıtse de, Qanat:

— Ata, at alyp berińizshi!— dep qoıarda-qoımaı ótine berdi.

— Balam-aý, atty ne qylasyń? Myna qońyr qunan da bir ózińe jetpeı me?— dedi atasy maqtaýyn jetkizip.

— Durys qoı, ata, aıtqanyńyzdyń bári ras. Biraq men bıyl báıgege shapsam dep edim.

— E, solaı de. Men seni áli kishkentaı ma desem, báıgege shabar balanyń sózin aıttyń-aý,— dedi atasy.

Qanat atasynyń kókeıde júrgen oıyn aıtqanyna shyn qýandy.
— Maqul ma, ata?

— Boldy, balam. Sen meni kóndirdiń. Báıgege qosylam deseń, jolyńdy tosyp ne bar. Aıtqanyń bolsyn.

Tań aǵara Qanat pen atasy aýdan ortalyǵyndaǵy mal bazaryna keldi. Tórt túlik maldyń bári osynda eken. Oń shette — sıyrlar, sol shette — qoılar, ortada — eshkiler, ishkerirekte — jylqylar. Úıir-úıir bolmasa da, arqanǵa baılanyp, kisinesip, shurqyrasyp tur.

Atasy men Qanat birden attarǵa kóz saldy. Súlikteı qara, kókteńbil, boz, qara, qońyr, aq, shubar attardan kóz súrinedi.

— Balam, alatyn atyńdy óziń tańda!— dedi atasy Qanatqa. Synaǵany emes, erikti nemeresiniń ózine berdi. Qanat aýyldaǵy attardyń, qunan men taılardyń qaısysy myqty, aýyzǵa ilineri bar ma, bárin derlik atasyna aıtyp júredi.

Atasy da aýyl-aımaqtaǵy attardan túgel habardar. Qanattyń aıtyp, maqtaǵan attaryna basyn ızep otyrdy. Onysy — Qanatpen kelisken belgisi.

— Ata,— dedi Qanat bazar ishindegi attardy túgel aralap bolǵan soń.— Sizge qaısysy unady?

— Anaý kókteńbil.

— Iá. Ol at jaqsy, ata. Tórt aıaǵy uzyn, tabany qorǵasyndaı myǵym, moıyny ózine jarasyp tur. Biraq men ózim attyń bireýin tańdap qoıdym, ata.

— Shyn aıtasyń ba? Kánekı, kórsetshi. Baǵanadan beri nege aıtpadyń?

— Attardy túgel kóreıik dep edim.

Atasy Qanat tańdaǵan attyń janyna keldi. Kádimgi tory at. Bolymdy, arqa tusy esik pen tórdeı, eki aıaǵynyń ortasyna bir kisi emin-erkin sıatyndaı jaramdy janýar eken.

Atasy men Qanat attyń basy men aıaǵyna, ońy men solyna, qaptalyna qarap, kózden ótkizdi. At ekeýine de jaqty. 7587585Unatqandary sonsha, tabanda saýdasyn keltirip, satyp aldy.

Kúzge salym alqaptar egisten bosaǵan kezde aýyl balalary bastary qosylyp, taı jarysyn ótkize bastady. Oǵan bastamashyl bolyp júrgen ózderi. Kópshiligi ár úıdiń bir-bir erkeleri.

Qara kúzde aýyl mańynda jyldaǵydaı at báıgesi ótti. Qanattyń esil-derti osy jarysqa at qosý bolatyn. Ol armanyna da jetti. Tory attyń babynda bolǵany qandaı jaqsy bolǵan. Oılamaǵan jerden top jaryp, márege birinshi keldi. Sodan beri Qanattyń aty Báıgetory degen atqa ıe boldy.

— Báıgetory qalaı, babynda ma?— degen óz dostaryna Qanat:

— Iá, babynda,— dep jaýap qatady.

— Kelip kórińdershi odan da,— deıdi atasy Qanattyń dostaryn jibergisi kelmeı. Solaı deıdi de, atasy óziniń jastyq shaǵyn eske alǵandaı, olarǵa qyzyǵa qarap qalady.

— Aınalaıyndar ásheıin, jap-jas bolsa da, attyń qadirin bilip, tanyp, ósip keledi. Qalaısha rıza bolmassyń,— dep ózimen-ózi kóńili tasyp turady.

---