InfoHub Logo

Óskemende aýyr atletıkadan 2009 jyly týǵan jáne odan kishi jasóspirimder men qyzdar arasynda oblys chempıonaty ótýde. Ziltemirshiler básekesine alty komanda qatysýda.

Aımaqtaǵy aýyr atletıkany damytý, ári sportshylar arasyndaǵy sheberlikti arttyrý maqsatynda ótkizilip jatqan sharada bas-aıaǵy 60 sportshy óz múmkindigin baıqaýda. Óskemendik jas atletterden bólek, Semeı qalasynan, Kúrshim, Tarbaǵataı, Altaı aýdandarynan jáne Ýst-Talovka aýylynan kelgen eken. Jarys nátıjesi boıynsha oblys quramasy jasaqtalyp, el chempıonatyna jol tartady.

 – Bul jerde birqatar tájirıbeli sportshylar jarys jolyna shyqty. Alaıda sporttyń biz boljaı almaıtyn tustaryn eskersek, ár salmaqta júldegerler qatary ózgerip salýy múmkin. Joǵary nátıje kórsetkenderi mamyrdyń 1-8 aralyǵynda Qostanaıda ótetin el chempıonatyna qatysady, – deıdi Olımpıadalyq rezerv mektebiniń aǵa jattyqtyrýshysy Denıs Devátkın.

Munda qyzdar segiz, al jasóspirimder 10 salmaqta júldeli oryndardy sarapqa salýda. Aldymen jeńil salmaqtaǵy burymdylar saıys shymyldyǵyn ashty. Apaly-sińili Belenko, ótken jyly el chempıonatynda kúmis medal ıelengen Sofá Shalgına syndy qatysýshylar julqa kóterý jattyǵýynda úsh múmkindikterin de sátti paıdalandy. Onyń ishinde, tóreshiler tarapy Sofányń aıaq alysyna oń baǵasyn berýde.

Ádilhan Esimhanov

---