InfoHub Logo

Ájem ishimdikti ishetin adamdy barynsha jek kóredi. Keıde: «osy qurǵyrdy nesine shyǵarady eken», — dep te qoıady.

Araq «aǵaıyndy» aldymyzǵa ala bastasaq bolǵany, qarıa bizge aldymen ala kózimen bir-eki qarap alady da, aıtary bolsa aqtaryp aıtyp, sodan keıin bólmeden shyǵyp ketetin-di.

Men de ishimdikke bálendeı áýes emespin. Degenmen, úıge qonaq shaqyrylsa nemese joldas-jora kele qalsa, quraýyz jibermeımin degendeı olardy da oılap, ózim de tam-tumdap ájemniń kózinshe áli asyra iship kórgen joqpyn.

Beıkúná qarıa ǵoı ájem: «aıtty bitti, ishkenniń bári birdeı mas bolady» dep oılaıtyn sıaqty. Rúmkalar kele bastaǵannan-aq:

— Shyraqtarym, osy mas bolý nege kerek? — dep bárimizge birdeı eskertý jasaıdy. Araq aralasqan jerde áste otyrmaı, tysqa shyǵyp ketetin. Sodan keıin qonaqtar ketkenshe qaıtyp qonaq úıge oralmaıtyn.

Búgin múlde basqasha. Mine, stolǵa rúmkalar da, ishimdik te keldi. Ájem tapjylar emes. Qarıanyń bizge aýdarylǵan ala kózi bárimizge de «qoısańdarshy» dep úkim etip turǵandaı. Bir sátte «kózimniń tiri kezinde ishkenińdi kóreıin, qalqam, ishseń, ishe ǵoı» degendeı maǵan birtúrli jyly qaraıtyn tárizdi.

Qonaqtyń biri ózimen-ózi bop otyrdy. Úlken adamǵa ádeppen sóz qatyp, jaı-kúıin surap, jón bilisý qandaı jaqsy. Ol turyp:

— Quıylyp qapty, kelińder, dostar, birdi tartyp jibereıik! — degeni. Sóıtip, birden qaǵyp saldy da, aldyna qoıǵan aq balyqty murnyna taqady.

Ájem jaryqtyq álgi jigit mas bolyp qaldy dep oılady bilem:

— Balam, aýzyń tómen qaldy, tómen, — dedi jaılap qana.

---