InfoHub Logo

Álem kún saıyn jańarýda. Kún saıyn túrli jańalyqtar ashylýda. Kún saıyn jańa jobalar iske asyrylýda. Kún saıyn bul ómirdiń bizge daıyndaǵan syıy artýda. Sondyqtan ár kúnge jańasha kózqaraspen qaraýǵa daıyn bolý kerek.

Álemdegi sońǵy bolǵan oqıǵalar búkil adamzatty dúr silkindirdi. Elimizdegi megapolısterdiń karantınge jabylýy, jumystyń toqtaýy, qoǵamdyq sharalardyń keıinge shegerilýi – bári bizder úshin kútpegen jańalyq. Al, eń úlken ózgeris – mektepterdiń qashyqtyqtan oqytýǵa kóshýi. Árıne, bul oqýshylar turmaq, muǵalimder men ata-analar úshin de qıyndaý bolyp tur. Kókeıde saýal kóp. Degenmen, ishtegi qorqynysh, úreı, senimsizdikke qaramastan alǵa qaraı qadam jasaý mańyzdy.

Bilim berý bul el bolashaǵy úshin asa jaýapty úrdis ekeni málim. Sondyqtan bilim berý salasyna qaı memlekette bolmasyn úlken júk artylady. Al qazirgi jaǵdaıda sapaly, eń bastysy nátıjeli bilim berý úrdisin uıymdastyrý eki ese qıyndaı túsetini anyq. Dese de, barsha áriptesterime «qashyqtyqtan oqytýdan» qashpaýǵa keńes beremin!

Qashyqtyqtan oqytý erte me, kesh pe bizge jetetin edi. Óıtkeni bul – zaman talaby. Aqparattandyrylǵan ǵasyrda ozyq tehnologıanyń úzdik jemisterin paıdalaný – damyǵan elderdiń sheshimi. Sondyqtan elimiz úshin bul da bir jańa beles, jańa shyń! Endeshe, sizdermen qashyqtyqtan oqytýǵa arnalǵan baǵdarlamalarmen bóliseıin.

1. Google Classroom qosymshasy

Bul qosymsha kompútermen de, uıaly telefonmen de kirýge yńǵaıly. Uıaly telefon úshin aldyn ala baǵdarlamasyn júktep alý qajet. Muǵalimder de, oqýshylar da gmail poshta arqyly tirkelý qajet. Tipti, mektepti de tirkeýge bolady. Bul mektep ákimshiligi úshin muǵalimder men oqýshylardyń jumysyn qadaǵalap otyrýǵa yńǵaıly bolary sózsiz. Muǵalim retinde tirkelgennen keıin siz óz pánińizge arnap arnaıy kýrs ashý múmkindigine ıe bolasyz. Kýrsty synyptar men pánderge qaraı bólip ashýǵa da bolady. Ár kýrstyń óziniń KODY bolady. Oqýshylar kýrsqa sol kod arqyly tirkele alady. Kýrsta ótiletin taqyrypty kún saıyn jarıalap otyrýǵa nemese aldyn-ala daıyndap, sabaq kestesine saı kúndi, ýaqytty belgilep, josparlap jarıalaýǵa múmkindik bar. Iaǵnı, bir synypqa arnalǵan sabaqtardyń barlyǵyn daıyndap qoıyp, sabaqtyń shyǵatyn kestesin belgilep qoısańyz, ol ózi avtomatty túrde jarıalanyp otyrady. Oqýshylarǵa tapsyrmalardy test túrinde, beınematerıal nemese prezentasıa túrinde usynýǵa bolady. Ár tapsyrma baǵalaý krıterıılerin engize alasyz. Oqýshylardan jumysyn jibergende sizge habarlama keledi jáne olar bir-biriniń jumystaryn kóre almaıdy. Mundaı oqýshymen keri baılanys jasaý múmkindigi de qarastyrylǵan. Ár oqýshynyń jumysyna ózi ǵana kóre alatyn jeke komentarı qaldyrýǵa bolady. Oqýshy jumysyn dápterge oryndap, sizge sýretke túsirip jibergen jaǵdaıda, onyń qatelerin belgilep, pikir qaldyra alasyz. Eń bastysy, bul qosymshada arnaıy jýrnal bolady. Kimniń qaı ýaqytta tapsyrǵanyn, qansha bal alǵanyn qadaǵalap otyrasyz. Sonymen qatar oqýshylardan kelgen faıldardyń barlyǵy Google Dıskte saqtalady. Kez kelgen ýaqytta qoljetimdi bolady.

2. Learningapps qosymshasy

Bul – sabaqty túrlendirýge arnalǵan qosymsha. Dástúrli sabaqtarmen oqýshylardyń qyzyǵýshylyǵyn tómendetip alýyńyz yqtımal. Sol sebepti Learningapps arqyly ár sabaqty qyzyqty formatta ótkizińiz. Munda oqýshylardy ózińiz tirkep, logın parólderin úlestirýge nemese qr kodpen bólisip, oqýshylardyń ózdiginen tirkelýine bolady. Arnaıy baǵdarlama júkteýdiń qajeti joq, saıtqa kirip, onlaın túrde qoldana beresiz. Uıaly telefon arqyly da kirýge bolady.

3. Telegram

Iá, bul – bárimizge belgili messendjer. Barlyq oqýshynyń jyldamdyǵy joǵary ǵalamtorǵa shyǵatyn múmkindigi joq. Bul oraıda mesendjerlerdi paıdalanýǵa bolady. Sonyń ishinde eń tıimidisi osy Telegram dep sanaımyn. Kompúer arqyly da, uıaly telefonmen de kire alasyz. Munda kanal ashyp, oqýshylarǵa sol kanaldyń siltemesin jiberýge bolady. Kanaldy kúndelikti sabaqtaryńyzdy, tapsyrmalardy jarıalap otyrasyz. Bir paıdasy oqýshylar mundaı jaza almaıdy, tek baqylap, kórip otyra alady. Al suraqtaryn jeke hat arqyly joldaıdy. Sonymen birge qysqasha saýalnama uıymdastyrýǵa da bolady. 

Qazir qashyqtyqtan oqytýǵa arnalǵan baǵdarlamalar óte kóp. Degenmen, bul usynylǵan qosymshalar eń tıimdi jáne qoljetimdi dep sanaımyn. Endeshe, iske sát, áriptester!

---