InfoHub Logo

Qazaqtyń alǵashqy jýrnaly «Aıqap» nebári 4 jyl shyqqanyna qaramastan tarıhta óshpes iz qaldyrdy. Jýrnalda sol kezdegi halyqtyń muń – muqtajy týraly maqalalary jarıalanyp otyrǵan. Solardyń biri Ahmet Baıtursynulynyń «Qazaqtyń ókpesi» maqalasy. Ol óz maqalasyn: «Qamsyz jatqan qazaqtyń kóńiline sońǵy kezde ǵana kire bastady. Basqa kelgen náýbettiń qaıdan kelgenin, kimnen bolǵanyn bile almaı, árkimnen kórip ókpeleıdi.  Paıdalanyp otyrǵan jerin mujyqqa alyp berdi dep úkimetke ókpeleıdi. Qazaq jerin qazynalyq etýge nege kóngen ótkenderge ókpeleıdi. Tómende qazaq ókpeleýiniń jóni bar ma, joq pa  - sony jazbaqpyn.» - dep qazaq halqynyń osy ýaqytqa deıin beıqam jatyp, endi ǵana oıanyp, jan-jaǵyna qarap jatqandyǵyn jáne kináni árkimnen izdeıtinin jazyp bastaıdy. Halqymyz da, handar da osy ýaqytqa deıin bilimge, ǵylymǵa qyzyqpaǵandyǵyn, tek óz ara jaýlasqandyǵyn synaı jazady. Biz bul túrimizben urpaǵymyzǵa qandaı mıras qaldyramyz deıdi. «Ózge jurttar ilgeri basqanda, qazaq keri basqan. Han basyn qarashaǵa teńgerý jeńil bolmasa da, óz aldyna jurt bolyp tura alatyn bolmaǵan soń, handarymyz halqymenen Rossıaǵa qosylǵan.» - dep Ahmet Baıtursynuly ashynyp, óz oıyn maqalasy arqyly jetkizgen. Sodan soń maqalada qazaq jeri týraly másele kóterilgen. Halyqtyń bolmashy narsege jerin satyp, almastyrǵanyn jáne qazaqtardyń jerden aıyrylyp, árjerge tentirep ketkendigin atap ótken. «Amalyńdy túzet, túzemeseń eshkimge kiná qoıma. Beti jamannyń aınaǵa ókpeleýi jón be? Nıeti jamannyń Allaǵa ókpeleýi jón be? Talap joq, úmit mol halyqpyz.» - dep Ahmet Baıtursynuly qazaq halqyna úndeý joldaıdy. Halyqty oıanyp, tirshilik jasaýǵa shaqyrady. Oqý oqyp, bilim alyp, kózi ashyq adam bolaıyq dep jazady. Qurdan qur qarap jatqanǵa beretin bolsa, ǵylym, óner degender qazaqta bolar edi. Alaıda olardyń biri de boıymyzda kórinbeıdi. Sondyqtan, bos jatpaı oqýǵa bet burǵanymyz jón. Ózimizge ókpelemesek, ózgege ókpeler bet joq. Kiná tek ózimizden, óz – ózimizdi qolǵa alýymyz qajet. Ókpeler bolsaq ózimizge ǵana – dep halyqtyń orynsyz renishin aıtyp ótti.

---