InfoHub Logo

Ahmethanǵa birde jyltyr júzdi jylmaqaı jigit kezdese ketedi.

— Oý, sizdi men baıaǵydan bilemin ǵoı. Sizdiń sóz saptasyńyz basqalardan bólek qoı. Siz, ıá, «Esim serini» jazdyńyz ǵoı. Oı, sondaǵy til-aı! Iá, siz sosyn «Sulýshashty» bir kósilttińiz-aý, aı, sondaǵy ýaqıǵa-aı! Basqalardy qoıshy, sizdiń jónińiz basqa ǵoı. Keleshek urpaq sizge talaı oralady áli.

Ahmethan úndemedi. Álgi áýmeser jigit araǵyn iship, tamaǵyn jep, qarqyldaı kúlip jónine ketti.

— Baıaǵydan beri naǵyz ótirikshini taba almaı júr edim. Qudaı qaıdan aıdap osy úıde kezdese ketkenin kórmeısiń be? Álginiń qyltıyp turǵan murty da jalǵan, bultıyp turǵan urty da jalǵan. Qaý shópteı qaba saqaly da jalǵan. Alabajaq kıimi de jalǵan. Júrgeni de jalǵan, kúlgeni de jalǵan. Sózi qyryq quraq boıama. Nurhannyń, Sábıttiń jazǵandaryn maǵan japsyryp jatyr. Jaratylys jalǵan adam osyndaı bolady, —
deıdi Ahmethan.

— Ondaıdy shińgirlegen shıpaq quıryq eshki dep te, turaǵy joq ásireqyzyl qyzteke dep te ataıdy, — deıdi taǵy da.

***

Ahmethan bir topta otyryp, qasyndaǵy qurdasynyń daýysyn salyp, sonyń sózderin aıtyp, júris-turysyn, qolymen oınatyp, tyńdaýshylardyń kóz aldyna keltiredi. Sonda qurdasy kúlkisin tıa almaı, ezýin jıa almaı:

— Iapyr-aı, bul dúnıede mundaı myljyń, mundaı ushqalaq adam da bolady eken-aý, — depti.

***

Seksennen asqan Ahmethanǵa keıingi kezde umytshaqtyq paıda bolypty. Bir kúni ol chemodannyń kiltin taba almaı, eski ábdireni azannan keshke deıin aınaldyrsa, kilti tós qaltasynan shyǵypty.

Birde Ahmethan ońtústik jaqqa kýrortqa barsa, kún tym jyly eken. «Aýyr boldy» dep jyly kıimderin qaıtadan úıine salyp jiberedi. Endi qaıtatyn bolyp, poezǵa mineıin dese bıleti joq bolyp shyǵady, qaıtadan satyp alýǵa májbúr bolady. Aýlyna kelip kostúminiń qaltasyn qarasa, qaıtatyn bıleti sonyń ishinen shyǵypty. Muny estigender:

— Bul tek Ahmetqannyń qolynan keletin sharýa ǵoı, — dep kúlisipti.

***

Bir dúkenshige Ahmethan bir zat surap barsa, «joq» dep jaýap beredi. Ahmethan keshe ǵana ol zattyń túsirilip jatqanyn óz kózimen kórgen eken.

— Qoımańnyń túkpirin tinttirmeıin deseń, ózińniń abyroıyńdy ashtyrmaıyn deseń, qatyn-balańdy ash qylmaıyn deseń, esep kitabyńnan shyǵyp, bir táýlikke bul aradan taban jaltyratpaıyn deseń, sol zatty beresiń, — depti.

Sonda satýshy:

— Aınalaıyn, Aha, aıtqanyńa kóneıin, aıdaýyńa júreıin, suraǵanyńdy bereıin, ózi jalǵyz zat edi, Ahań aldy demeıin, — depti.

Ahań:

— Joq, ol zat maǵan kerek emes, ánsheıin seni synaıyn dep edim, — depti.

---