InfoHub Logo

Kún sýytty. Qar jaýdy japalaqtap. Túrli-túrli oıýlarmen bezengen qar ulpalary tóńirektiń bárin de sıqyrlaýda. Sóıtip, mańaıdy qıal-ǵajaıyptarǵa jeteleıtin keremet sýrettermen baıyta tústi. Tań atqannan beri jaýǵan qardy áldebireý tý-ý tóbeden óz demimen tómenge qaraı úrlep jatqandaı-aý, shirkin!

— Ata, — dedi Baqytbek.

— Aý, qaraǵym.

— Myna qardy úrlep, jaýdyryp turǵan kim ózi?

Atasy nemeresiniń qıalǵa baı oı álemine rıza bolǵandaı peıilmen:

— E-e, balam, bul qar men aıazdyń piri — Aıaz ata, — dep jaýap qatty.

Sodan soń ol óz sózin odan ári jalǵastyrdy:

— Erte, erte zamandarda qalyń orman ishinde Aıaz ata ómir súripti. Qys kelgende, aspannan qar jaýǵanda, ol ný orman ishinen shyǵady eken. Aq kıiz baıpaq kıgen aıaqtaryn balpań-balpań basyp, el men jerdi túgeldeı aralaıdy eken.

Qabaǵyna qar turǵan, aq saqaly belýaryna túsken Aıaz ata ózimen birge appaq qardy, onyń artynan aıazdy ertip ákelýdi ádet etipti.

Attaryn shanasyna jegip alyp, uzaq jolǵa shyǵady eken.

Attary tipti júırik kórinedi. Zýyldaǵan kúıi jer betin tez arada sharlap shyǵady. Áp-sátte, kózdi ashyp-jumǵansha basyp ótken aýyldar men qalalar aq kórpedeı  qalyń qarǵa oranady.

— Ata, bizdiń aýyldyń ústinen de Aıaz ata ótti me sonda?— dep surady nemeresi atasynyń shynaıy aıtqan sózderine eshbir kúmán keltirmeı.

— Iá, balam, ysqyryp, shaýyp, zýlap, ánekı, barady,— dedi atasy da boraǵan qardyń ýiline qulaq salyp.

Baqytbek atasynyń aıtqan sózderine razy boldy.

— Júr, balam, kún de keshkirip qalypty. Aınalanyń bári appaq boldy. Úılerdiń terezelerinde  jaryq paıda bolypty. Qar toqtaǵan soń kún sýytyp, aıaz paıda bolady.

Atasy men nemeresi aıaqtaryna jabysqan qardy qaǵyp, ishke endi. Úıdiń ishi syrttaǵydaı emes, jyp-jyly. Baqytbek ústindegi jyly kıimderin sheshti. Sóıtti de, tereze syrtyna kóz saldy.

Dalada bir noqat joq. Bári appaq. Aq túske oranǵan álem.

---