InfoHub Logo

Aıaǵyn jasqana basyp, taldyrmash boıly bir qyz bala Robert Karlovıchpen birge synypqa kirdi. Ózi kirshiksiz bop kıingen. Jasy biz qatarlas. On-on birler shamasynda. Qos burymy kórikti keskinine ádemi sán berip tur.

— Káne, balalar, tanysyp qoıyńdar, jańa oqýshy. Aýylymyzǵa kóship kelgen. Esimi  Gúljan, — dep tanystyrdy Robert Karlovıch.

Gúljanǵa tesile qarap qalyppyn. Onyń árbir qımyl-qozǵalysyn qas qaqpaı baǵyp, ketkenim sonsha, aǵaıdyń Gúljandy otyrǵyzatyn oryn izdep, artqy partada jalǵyz otyrǵan maǵan qadalyp qalǵanyn da ańǵarmappyn.

— Jumash! — degen daýysyn estigende ǵana selk ete túsip, ornymnan ushyp turdym.

— Men?! — dedim sasqalaqtap.

— Jumash, búginnen bastap Gúljan ekeýiń birge otyrasyńdar.

Únsiz bas ızedim. Endigi oıym — partanyń yńǵaıly jaǵyn ózime qaldyrý.

Árıne, kóp oılanbastan-aq, tereze jaǵyn tańdadym. Bul tustan barlyq úıler alaqandaǵydaı bop kórinedi. Jol boıymen ótip jatqan mashınalardy, úılerdiń shatyryna ornatylǵan qaratorǵaı uıalaryn da kórip otyrasyń.

***

Gúljan meniń qataryma otyrdy.

Úziliske qońyraý soǵylysymen Gúljanǵa birinshi aıtqan sózim:

— Dos bolaıyq, jaraı ma? — boldy.

Ol betime jalt qarady da:

— Dos bolsa, nesi bar? — dep maǵan qolyn usyndy.

Áńgimeni odan ary óristetkim kelip:

— Úıleriń qaı tusta? — dedim.

— Anaý tóbesinde qaratorǵaı uıasy joq úı she, sonda turamyz.

— Qaratorǵaı uıasy joq? — dedim men oılanyp.

— Buryn bolǵan. Kóshkende buzyp ketipti. Iesi bir sotqar bala bolsa kerek.

Men ol «sotqar balanyń» burynǵy óz partalasym ekenin bile qoıdym da:

— Iá, ol sondaı bolatyn, — dep uıala qostadym. — Gúljan! — dedim sonsoń kóterińki únmen.

— Nemene?

— Erteń-aq qaratorǵaı uıasy daıyn bolady?!

— Shyn ba?!

— Iá, — dep, oǵan qolymnan neshe túrli aǵash buıymyn jasaý keletinin, úıdegi múıiz sapty ótkir kezdigimmen talaı keremetter jasaýǵa bolatynyn aıttym. Qaratorǵaı uıasyn jasaý qolymnan keletini anyq edi. Sondyqtan:

— Mine, ýáde beremin!— dep qolymdy batyl usyndym.

***

Men ýádede turdym. Qaratorǵaı uıasy kelesi kúni daıyn boldy. Biraq onyń esesine orys tilinen berilgen tapsyrmany jazbaı keldim.

Qyrsyqqanda, búgingi alǵashqy sabaq orys tili edi. Robert Karlovıchten sál-aq buryn keldim. Kelgennen Gúljanǵa:

— Qaratorǵaı uıasy daıyn boldy! — dedim maqtanyshpen.

— Shyn aıtasyń ba? Daıyn boldy ma?

— Árıne! Ýáde bergen soń…

Bizdiń jarastyqty áńgimemizdi sabaqtyń bastalýy bóldi.

Dápterimdi endi ala bergenimde, Gúljan:

— Káne, jazǵanyńdy kórsetshi, — dep qaldy. — Denem túrshigip ketti.

— Ony qaıtesiń? — dedim betine jalt qarap.

— Kórsetkiń kelmeı me? — dep Gúljan qyzara kúlimsiredi. Men qatty qysyldym. Kinámdi moıyndaýdan basqa lajym qalǵan joq. Jazbaǵanymdy aıttym.

— Jattyǵýdy kim oryndamaı keldi? — dep surady Robert Karlovıch.

Eshkim qolyn kótermedi. Demek, bári de oryndap kelgen.

— Sen nege kótermeısiń? — dedi Gúljan sybyrlap.

— Dos bolsań, úndeme… — dedim men qulaǵyna kúbirlep.

— Muǵalimdi aldaýǵa bolmaıdy!

Onyń daýysy qatty shyǵyp ketti. Robert Karlovıch bizge jalt qarady.

«Búldirdi, — dedim ishimnen, — dosqa jaryǵan ekenmin!» Gúljan munymen de tynbady. Aldyma bir japyraq qaǵazdy ysyryp qoıdy. «Muǵalimdi aldaımyn dep áýre bolma, moıynda», — dep jazypty. Men de: «Ekilik» al deısiń be?» — dep jazyp, ózine qaıyrdym.

Gúljannyń:

— Óziń aıtpasań, men aıtamyn, — degen yzaly sybyryn estidim. Ol qolyn kótergeli oqtalyp otyr eken. Men qolyn ustaı aldym:

— Keregi joq, ózim…

Ornymnan zorǵa turyp, muǵalimge jattyǵýdy jazbaı kelgenimdi aıttym.

Robert Karlovıch meni bastan-aıaq sholyp ótti de, keıisti únmen:

— Nege jazbadyń? — dedi.

Men «umytyp ketippin» degeli tur edim, menen buryn Gúljan til qatty:

— Onyń qaratorǵaı uıasyn jasaımyn dep qoly tımepti. Maǵan ýáde bergen-di, — dedi.

Robert Karlovıch qaıyrymy túsip, maǵan «ekilik» qoıǵan joq. Biraq onysy «ekilik» qoıǵannan da jaman batty.

Sabaq aıaqtalyp, úıge qaıtyq. Men tóbesinde qos qaratorǵaı qonaqtap otyrǵan Gúljannyń úıi jaqqa qarap qoıdym da:

— Qazir bizdiń úıge soǵyp, qaratorǵaı uıasyn alyp shyǵaıyq. Sodan keıin seniń úıińe baramyz, — dedim Gúljanǵa.

— Qaratorǵaı uıasyn? — dep, ol qabaǵyn tańdana kóterdi.

— Senbeısiń be?

— Sen maǵan renjimeıdi ekensiń ǵoı?

— Shyndyqqa nesine renjımin? — dedim jadyraı sóılep.

— Shynymen, qaratorǵaı uıasyn ornatyp beresiń ǵoı?

— Árıne, ýáde bergen soń, oryndaý kerek.

Jańa dosymnyń júzi nurlanyp sala berdi.

---