InfoHub Logo

Uıaly telefonyma óz áıelimniń atyn Hadısha dep jazyp qoıdym. Kim biledi, oǵan da bir sebepter bolǵan shyǵar. Ózine bul týraly aıtpadym. Bir kúni meniń telefonymdy alyp qoldanǵysy keldi. Qarasa, betinde bir kúnde birneshe ret telefon soqqan Hadısha degen esim tur. Túri ózgerip, óńi qashyp, qany qaınap jatqany baıqalady.

Ashýlanyp Hadıshanyń kim ekenin surady. Men bolsam, abaısyzda ot tutanyp ketpesin dep jaýap bermeı turmyn.

— Aıtyńyz, kim ol Hadısha degen? Kózime týra qarap aıtyńyz!

— Onyń ózinen sura, maǵan ne deısiń? — dedim.

— Suraımyn, qazyr-aq suraımyn.

Jalma-jan qolyndaǵy meniń telefonymmen, Hadısha hanymǵa telefon soǵa bastady. Birneshe sátten keıin óziniń telefonyna qońyraý keldi. Qarasa, meniń atym shyǵyp tur. Áıelim ań-tań.

— Meniń atym Hadısha emes qoı, dedi eleýsiz ǵana tómen daýyspen. Oryndyqqa otyra ketti. Óziniń aıtqan sózderimen minezine me, álde, meniń isime me, áıteýir, qaıran qalyp tur. Men de osy kezde:

— Nege Hadısha emessiń? Sendegi adal áıelge tán sıpattar she? Tereń túsinigiń men maǵan qylǵan qyzmetteriń she? Osynyń bári, bolmasań da, Hadısha anamyzǵa tán kórkemdilik emes pe? Allahý ta’ala násip etse, Fırdaýs jánnatyndaǵy qosaǵymsyń, — dedim.

Bir kezde áıelimniń kózderinen móltildep jas tama bastady. Men Áıel tárbıesine qatysty sabaqty sońyna deıin jetkizeıin dep: «Endi bildiń be, Hadısha degen kim ekenin?». Kim ol Hadısha degen, kózime týra qarap aıt deısiń. Aıtaıyn: «Hadısha degen, mine sol adam!» — dep túıindedim.

Biraz únsizdikten esin jıǵan jubaıym: «Rabbym qalasa, ondaı áıel de bola alamyn. Sizdi eshqashan jerge qaratpaımyn», dedi. Maǵan da keregi osy edi. Qudaıdan tileıtinim de qos dúnıede qosaǵymmen qosa aǵarý!

E.Ertaıuly «Jubaıyńnyń júregin jaralama, jaýla» kitabynan.

---