InfoHub Logo

Orta júz qazaqtary jońǵar shapqynshylyǵynan birjola qutylyp, jerleri jaýdan tazarǵan kezde, Abylaı, Tóle bı bastaǵan qazaqtyń jaqsy men jaısańdary qalmaq handyǵynyń taǵyna ózderi unatatyn jáne qazaq halqyna ish tartatyn Ámirsana degen noıandy otyrǵyzbaqqa kúsh salyp kóripti. Osy áreketterdiń ishine Eskeldi batyr da qatysyp, neshe dúrkin qalmaq eline baryp qaıtyp júripti.

Bul kezde Uly júz, onyń ishindegi jalaıyrlardyń jazǵy jaıylym-jaılaýlary jaýdan tolyq tazartyla qoımaǵan eken. Jońǵar qaqpasyna taıanǵanda Eskeldi hannan ruqsat surap, bıik taýlar Sartór, Saryjazyq, Tólektiń tóri atty jaılaýlar arqyly aldy İle, arty Shý boıynda jatqan eline qaraı bet túzeıdi. Shaǵyn qolmen talaı qıyndyqtardy kórip, Qyzylaýyz degen jerge jetkende, sol aradan bir kósh boıy
jerdegi teriskeıdi alyp jatqan eńseli taý men aǵyndy ózenniń basynda qalmaqtardyń jarty myńdaı qolynyń jasyrynyp jatqanyn estıdi. Olardy kórgen Eskeldilerden bólinip, ań aýlaı shyqqan Táttibaı mergen eken.

Aldymen elshi salyp kórse, qalmaq qolyn bastaǵan Shaja degen noıan bolyp shyǵypty. Eskeldi óziniń eki júzge tarta shaǵyn qolyn tóbe-tóbelerdiń basyna taratyp, «art jaǵymyzda qalyń ásker» degen úreı týdyrypty. Úlken túmennen bólinip qalǵan qalmaqtar qazaqtardan aman ketýdiń birden-bir joly jekpe-jek dep uıǵarsa kerek. Olar basyna buqanyń múıizin baılaǵan Shaja batyrdy shyǵarypty. Eskeldi batyr shoıyn shoqparyn sonda birinshi ret jumsap, Shajany bir siltegennen-aq jan tásilim etkizipti deıdi.

Batyrlary ólgen soń, basqalary attarynan túsip, tize búgipti. Jeńilgen men jyǵylǵandardy judyryqtamaý ol kezdiń qatań ǵurpy eken. Esekeń eshbir qalmaqqa zábir kórsetpesten, eline qaıtaryp turyp:

— Batyrlaryń sender úshin mert boldy. Soǵys dalasynda qaza bolǵan mundaı jandardy qazaqtar sheıit deıdi. Máıitin arqalap tegi kete almaısyńdar, odan da aq jaýyp, arýlap osy araǵa jerleńder. Biz myna taý men ózendi osy batyrlaryń nyń esimimen Shaja dep ataıyq depti, — deıdi jaryqtyq.

---