InfoHub Logo

Nıshapýr qalasyna óz kásibiniń sheberi, onyń ústine jaratylys-tabıǵaty kúldirgi bir qaıyrshy keldi degendi bir qarıadan estigenim bar. Ol bir oǵash qonaq úıge toqtapty. Qala qaıyrshylarynyń bári sonda jınalypty da, álgi qaıyrshy solardyń meımany bolypty. Ol:

— Qaıyr-sadaqa suraǵandaǵy meniń qoldanatynym — óz isimiz sheberleriniń oıyna da kirip shyqpaǵan ádis, meniń aıla-tásilim eshkimniń qaperinde de bolǵan emes, — dep otyrǵandardyń namysyna tıe bastaıdy.

Kelesi kúni jıyn shaqyrady. Qonaq qaıyrshy bıikteý jerge shyǵady da, biraz ýaqyt sóıleıdi, jurttyń bári uıyp tyńdap, qaıran qalady. Ol:

— Zamanymyzdyń ıgi jaqsylary-aý, meıirimi mol adamdar! Myna men músápirge qulaq qoıyńdarshy. Aıtqan antyn buzýy sebepti Izraıl áýletiniń biriniń syn-sıpaty ózgerip, maımylǵa aınalyp ketkenin estigen bolarsyzdar. Mine, men de solardyń áýletinen tarappyn, boıymda dáleldemem de bar. Ol mynadaı — maımyldyń quıryǵy tárizdi quıryǵym bar. Qazirgideı masqarashylyqty, bul syrymdy eshkimge aıtpaýshy edim, biraq qazir ólsheýsiz joqshylyq kórip, jaǵdaıym josyqsyz aýyr kúıge tap bolǵandyqtan, basymdy uıatsyzdyqqa baılap, kemshilik syrymdy aıtpasqa amalym joq. Sol quıryǵymdy ózderińe kórseteıin, biraq árqaısyń raqymshylyq istep, ózime qaıyr-sadaqa berip, meıirimin bildirer degen úmitpen ǵana kórsetem. Ondaılyq oǵash sumdyqqa bir qaraý degen — sender úshin esterińnen ketpes ersi oqıǵa. Mundaı ǵalamatty sender endi qaıtyp eshqashan kórmeısińder de, estimeısińder. Sol jerde turǵandar onyń alaqanyna: bireý — altyn untaǵyn, bireý — syńǵyrlaǵan altyn teńgeligin, bireý — kúmisin salyp, ájeptáýir soma jınalypty. Aqshany sanap alyp, eńirep qoıa beredi:

— Baýyrlar, uıattan óle jazdap otyrǵanym. Quıryǵym art jaǵymdy bolýshy edi, endi qatty qysylǵandyǵymnan bolar, aldyńǵy jaǵyma aýysypty. Áıelder de, aqsúıekter de jınalyp turǵandyqtan, meni jalańashtap olaı masqaralaýǵa jol bermeıtinderińdi bilemin. Bulardyń kózinshe abyroıymdy aırandaı tóge almaımyn.

Turǵandardyń bári shek-silesi qata kúlipti. Keıbireýleri tapqyr eken dep muny maqtaı bastap, ózgeleri qarǵysty jaýdyrypty-aı kelip, biraq bul aqshasyn alyp qoıǵan edi. Qaıyrshylar arasynda osyndaı aılakerleri de bolypty.

---