InfoHub Logo

(parsy ertegisi)

Bir kisi kerýeninen kóz jazyp qalyp adasyp ketipti. Qum arasynda qańǵyp júrip, esiginiń aldynda kempir otyrǵan, onyń qasynda ıt baılaýly turǵan qyńyraıǵan lashyqqa kezdesipti. Álgi kisi kelip sálem bergende, kempir jyly shyraımen qarsy alyp, qasyna otyrǵyzady.

— Kerýennen kóz jazyp qalyp edim, — deıdi kisi, — nár tatpaǵanyma áldeneshe kún boldy. Qaýjańdar birdeńeń bolsa bere kór.

— E, balam, - deıdi kempir, — alystaǵy sonaý jazyqty kórdiń be? Sonda jylan kóp, bireýin ustap ákel, pisirip jeıik.

Qaıran qalǵan jolaýshy:

— Men jylan ustaı almaımyn! — deıdi. — Olaı bolsa, — deıdi kempir, — ekeýmiz birge baraıyq.

Kempir ıtin bosatady da, ekeýi jazyqqa qaraı ketedi. Eki úlken jylan ustap alyp, quıryqtaryn, bastaryn kesip tastap, otqa qoıyp, qýyra bastaıdy. Jylannyń eti pisedi. Jolaýshy ólerdeı ash bolǵan soń, amalsyz jylannyń etin jeıdi. Sodan soń qatalap shóldeıdi.

— Úı aldynda áne jerde bulaq bar, — deıdi kempir.

Kisi bulaqtyń basyna kelip, sýyn iship kórip, sasyq ıisi baryn sezedi. Sonda ol kempirden:

— Osyndaı jaısyz jerde nesine turyp jatyrsyń? — dep suraıdy.

— Budan jaqsy jer tappaısyń,  — deıdi kempir, — keń jazyq, bulaǵynyń sýy mol, budan artyq jalǵanda jaqsy jer tabyla ma?

— Bizdiń jerimizde,  — deıdi kisi, — arnaly ózender aǵyp jatady, aǵashtardyń butaqtary jemisten maıysyp turady, tátti-dámdi taǵam mol. Jylannyń etin jeý degen óńim túgil túsime de kirgen emes.

— Onyń bári jón ǵoı, — deıdi kempir. — meniń suraǵyma jaýap bershi endeshe, sondaı rahat tirshilikte senderge ámirin júrgizetin, qyspaqqa salatyn bireýler bar ma, joq pa?

— Iá,  — deıdi kisi, — onda han da, hakimder de bar, olar ózderiniń qol astyndaǵylarǵa salyq salady.

— Senderdiń rahattaryń óktemdiksiz, ezýshiliksiz bolmaıdy, sondyqtan ol jylannyń ýynan jaman,  — deıdi kempir. Ý ishsem de, ondaı rahatqa qaraǵanda, erkindikte júrgenge ne jetsin.

---