InfoHub Logo

Ertede patshanyń eki qyzy bolypty. Patsha eki qyzyn da jaqsy kóripti. Qyzdary ne qalasa, sony berip, betinen qaqpaı ósiredi. Biraq óse kele qyzdarynyń minezi ózgere bastapty. Úlken qyzy únemi muńaıýmen, al kishi qyzy jadyrap júredi eken. Patsha birde Ulyqpan hakimdi shaqyryp:

— Hakim, meniń eki qyzym bar. Kishi qyzym únemi jadyrap júredi. Al úlken qyzym kúlmeıdi, dertin eshkim bilmeıdi, — dedi.

— Patsham, ruqsat etseńiz, saraıyńyzda birneshe kún qonaq bolaıyn. Qyzdaryńyzdyń minezin kóreıin, jaýabyn sodan keıin bereıin, — dedi Ulyqpan. Patsha ruqsat etedi.

Ulyqpan eki qyzben kúnde suhbattasyp, syr bólisedi. Baıqasa, jaıdary júretin kishi qyzy uıyqtar aldynda únemi tek jaqsylyqtar oılaıdy eken. Tańerteń uıqydan turǵanda da tek jaqsy adamdardy, jaqsy isterdi oılap oıanatyn bolypty. Al úlken qyzy kúni boıy kórgen qıynshylyqtar men jamandyqtardy eske túsirip uıyqtaıdy eken. Tańerteń de tósekten turǵanda keshegi kórgen jaǵymsyz oqıǵalardy esine túsiretin bolypty.

Ulyqpan patshaǵa kelip:

—  Patsham, ómir aına sıaqty. Adam aınadan ózin qalaı kórgisi kelse, aına ony solaı kórsetedi. Ómirdiń jaqsy jaqtaryn oılasaq, ómir bizge ádemi kórinedi. Sizdiń úlken qyzyńyz ómiriniń tek jaman jaqtaryn oılap júredi. Sondyqtan onyń oıyn da jamandyq bılep, ashý-yzaǵa tez boı aldyrady. Qabaǵy ashylmaıdy. Budan bylaı ol jatar kezinde tek jaqsy oı oılasyn. Tańerteń turǵanda da jaqsy tilekpen, jaqsy nıetpen oıansyn. Sonda kóńildiń kiri tez ketedi, — depti.

Sodan bastap úlken qyzy tek jaqsylyqtar oılap júretin bolypty.

---