InfoHub Logo

Nuraı óte elgezek qyz. Úlkenderdiń biri: «Kim úı tazalaıdy, kim tósek jınaıdy nemese kim ydys-aıaq jýady?» — dese, «men» dep birinshi bolyp qol kóterip, kómekke keledi.

Mine, ol búgin de naǵashy ájesiniń qasynan tabyldy. Ájesiniń bir shuǵyl jumysy shyǵyp, qolyndaǵy sharýany Nuraıǵa tapsyrdy da, asyǵys kıinip, shyǵyp ketti.

Nuraı shyny-aıaqty jýýǵa kiristi. Tazarǵan ydystardy jaılap ornyna qoıdy. Bir sháshkeniń syrtyndaǵy daqtyń ketpeı qalǵanyn baıqady. Ony ysqyshpen súrte salmaq boldy. Qatty ustady, álde qatty ysty, bilmeı qaldy, kenet sháshke ekige bólindi de qaldy.

Nuraı sasyp qaldy. Qalaı boldy bul? Ájesi «kim syndyrdy» dese, ne deıdi endi? «Janaı syndyrdy» dep, inisine jaba salaıyn dese, úıde ózinen basqa eshkim joq.

Qoqys salatyn shelekke laqtyra salaıyn dep bir oqtaldy da, ájesi kórip qoıatynyn oılap, bógelip qaldy. Ne istese eken? Al bul ájesi jaqsy kóretin sháshke bolyp qalsa-she? İzdese, surasa, ne aıtýy kerek?

Ájesi qabaǵy qalyń, kózi ótkir, susty kisi bolatyn. Jaıshylyqta óte meıirimdi bolǵanymen, ashýy kelse, barlyǵy qaımyǵatyn. Sony oılap Nuraı tipti de jaısyzdana tústi. Sóıtip turǵanda syrttan kenet aıaq tyqyry estildi. Ájesi eken, jaılap basyp kirip kele jatty. Nuraıdyń júregi atqalaqtaı tústi.

— Nuraı, qaıdasyń? — dedi ájesi ishke engen soń.

Ánsheıinde «áje, men mundamyn» dep, aldynan júgirip shyǵatyn Nuraı únsiz qaldy.

Ájesi endi asúıge buryldy.

— Nuraı?

Esik qarap turǵan Nuraı qolyndaǵy eki bólingen sháshkeni ájesine qaraı usyna berdi.

— Kim syndyrdy? — dedi ájesi tańyrqap.

— Men, — dedi Nuraı daýysy dirildep. Artynsha óz-ózin toqtata almaı jylap jiberdi.

— Ne boldy? — dedi ne bolǵanyn túsinbegen ájesi odan ary tańyrqap.

— Men… baıqamaı… sháshkeni syndyryp aldym, áje…

— Eshteńe etpeıdi, qulynym! — dedi ájesi mán-jaıdy bilgen soń Nuraıdy baýyryna tartyp. — Jylama! Eshteńe etpeıdi. Qaıta seniń shyndyqty aıtqanyńa rıza bolyp turmyn! Aqyldy balalar eshýaqytta ótirik aıtpaıdy. Qoryqsa da aıtpaıdy…

Bul sózdi estigen Nuraı ájesin jaqsy kórgeni sonsha, etegine oralyp, qushaqtaı aldy.

Sálden soń:

— Eshýaqytta ótirik aıtpa! Ótirik aıtqan balaǵa dostary senbeıtin bolady,— degen ájesiniń meıirimdi sózi keldi qulaǵyna.

Nuraı jylap turyp basyn ızedi.

---