InfoHub Logo

Demalys kúni bolatyn. Nartaı úı mańynda dostarymen birge oınap júrgen-di. Bir kezde esik aldynan daýystap ájesi shaqyrdy.

— Alysqa uzap ketpe. Sálden soń úıge qonaq keledi, — dedi qasyna barǵanda ájesi qadaǵalaı tapsyryp. — Ary-beri jumsaǵanǵa tappaı qalyp júrmelik.

— Áje, úıge kim keledi? — dep surady Nartaı qashanǵy daǵdysymen tosyn jańalyqqa nazary aýyp.

— Jeksen aǵańnyń kelinshegi keledi, — dedi ájesi óz sharýasyna buryla berip.

— Jeksen aǵam da kele me?

— Joǵa. Oǵan ne bar! Kelinshegin otqa shaqyryp otyrsaq.

Nartaı eshteńe túsinbeı qaldy. «Ot» degende laýlaǵan órt keldi kóz aldyna. Sosyn suraǵyn ary jalǵady.

— Áje, azdan soń esik aldyna ot jaǵamyz ba?

— Joǵa. Ony qaıdan shyǵardyń! — dedi ájesi jalt burylyp. Artynsha Nartaıdyń júzinen «otqa shaqyrý» degen sózdi durys túsinbeı qalǵanyn ańǵaryp, túsindire sóıledi. — Jeksen aǵań áneý kúni kelinshek aldy ǵoı… bilesiń be?— dedi.

— Iá. Bilem.

— Bilseń, sol… sol jańa túsken kelindi úıge shaqyrdyq. Jańa túsken kelindi jaqyn týystar úıine shaqyryp, tanystyq bildirip, úı kórsetedi. Sony…

— Sony «otqa shaqyrý» deı me?

— Iá. «Kelindi otqa shaqyrý» deıdi.

— Endi bildim, áje! Men esiktiń aldyna ot jaǵady ekenbiz desem…

— Qaıdaǵy ot… «Ot jaqqan jerin kórsetý» degennen shyqqan bolý kerek. Qazaq úıdi «otbasy», «ot jaqqan jer» dep te aıtady emes pe… Alysqa uzap ketpe! Kerek bolasyń!

— Qup bolady!— dedi Nartaı symdaı bolyp tura qaldy. Oń qolyn shekesine apardy. — Buıryǵyńyzdy oryndaýǵa daıynmyn, kapıtan!

— Quldyǵym ásheıin! — dedi ájesi Nartaıdyń myna qyzyq qylyǵyna súıine jymıyp.

---