InfoHub Logo

Bizge kórshi úıde Amangeldi degen bes jasar bala bar edi. Maıdanda qaıtys bolǵan ákesi Qarıdan aýmaǵan ala kóz, kesek, qara bala bolatyn.

Amangeldi ekeýmiz bir kúni qala syrtyndaǵy kólge bardyq. Boı jazdyq. Sýǵa tústik. Alysta, aıdynnyń ortasynda top úırekter júr. Men tereńge qaraı biraz júzip baryp edim, jaǵada taıyz sýda oınap júrgen bala maǵan aıqaı saldy.

— Aǵa, maǵan anaý úırekti ustap bershi?

— Úırek qazir ustatpaıdy. Erteń myltyq ákelemiz de atamyz, — dedim men oǵan.

Úıge qaıtyp kele jatqanymyzda bala sol úırek jaıyn áńgimeleı berdi.

— Aǵa, myltyqpen atyp alǵan soń úırekti maǵan beresiń be?

— Iá, saǵan berem.

— Men sosyn úıge alyp baram ba?

— Iá, úıge alyp barasyń.

— Men sosyn Kúlásh apama as deımin be?

— Iá, as deısiń.

— Men sosyn jeımin be?

Shydaı almadym. Balanyń bal-bul tilin qyzyqtap kúlip jiberdim.

---