InfoHub Logo

Bizdi birinshi klastan bastap oqytyp kele jatqan muǵalimdi «táteı» deımiz. Ol kisiniń boıy bizdiń tórtinshi klastaǵy Tursyn degen baladan az-aq qalqyńqy. Sondyqtan da bolý kerek, aýyldaǵy kempirler táteıimizdi «kishkentaı qyz» — dep ataıdy. Meıli, atasa ataı bersin, báribir biz óz táteıimizdi eldiń bárinen de artyq kóremiz.

Oınap júrgenbiz. Bir kezde klastas bala Qanat qasymyzǵa júgirip keldi.

— Ýra! — dedi ol, entige aıqaılap. Bul onyń birdeńege qýanǵanda aıtatyn súıikti sózi.

Táteı meni jaqsy kóredi, — dedi aspannan túskendeı-aq maqtanyp. Biz basqa balalar oıyndy qoıyp, ańyrap turyp qaldyq.

— Jańa táteı bizdiń úıge keldi. Meni velosıped tebýge úıretti... Shashymnan sıpady, arqamnan qaqty. «Sen óte jaqsy jigit bolasyń, Qanat» dedi, — dep taǵy da maqtana tústi. Óziniń eki beti albyrap tur. Biz onyń aıtqanyna sendik. Táteıdiń klastaǵy balalardyń bárinen de Qanatty jaqsy kóretini ap-aıqyn sıaqty. Biz muńaıyp qalǵandaı edik, eshqaısymyzdyń da oıynǵa zaýqymyz joqtaı...

Áı, bizdiń klastyń balalary-aı, qıt etse: «Táteı meni jaqsy kóredi» dep, maqtanyp shyǵa keledi. Birinshi klastan beri talaıy qaıtalady-aý osy sózdi. Tek men ǵana áli bir ret aıtqan emespin. Aıtýdyń reti kelmedi me, álde, táteı meni jaqsy kórmkeı me... Bilmeımin. Jaqsy kórmeıtin bolar. Áıtpese bir ret maqtar edi ǵoı.

Erteńine, klasta otyrǵanda da, osy renish kóńilimnen ketpeı óqoıdy. Shynymen-aq táteıdiń shet qaqpaı etkeni men bolǵanym ba? Osy táteı dese, úzilip turmyn ǵoı. Birinshi ret qatty jabyrqadym. Óz-ózimnen bireýge tıisip, aıǵaı salǵym keldi. Aldymda otyrǵan Kenjeniń burymynan julqyp aldym.

— Samat! — dep, ol maǵan shańq ete tústi, biraq jýrnalǵa áldeneni jazyp otyrǵan táteı baıqaǵan joq. Kenjeniń burymyn taǵy da tarttym.

— Táteı, Samatty qarańyzshy... — dep, Kenje jylap qoıa berdi. Táteı qabaq shytyp, stoldy tyqyldatty.

— Onyń ne, Samat? — dedi maǵan tiksine qarap. Men ornymnan turdym. Ia, dál solaı, táteı meni eshýaqytta jaqsy kórmeıdi eken. Yzadan jylaǵym kelip ketti. Biraq namystandym da, ernimdi tistep, turyp qaldym.

— Káne, onda úıge bergen tapsyrmany aıta qoıshy, — dedi táteı.

Men úndegem joq.

— Bilmeısiń be?

— Bilem... aıtpaımyn, — dedim.

Klass ishi tym-tyrys bola qaldy. Balalardyń barlyǵy da maǵan qadalǵan. Táteı jaılap ornynan turdy. Aryly-berili júre bas tady.

— Óıtseń, men saǵan ókpeleımin, Samat, — dedi onan soń.

«Meıliń, aqyr meni jaqsy kórmeısiń», — dedim ishteı.

Men balalardan bólinip, nege urynarymdy bilmeı, oqshaý kelemin. Anadaı jerde pysyldap, kúıis qaıtaryp jatqan súzegen taıynshany sýmkammen basynan bir qoıyp jibermek edim... Kenet ushyp túskenimdi ǵana bilemin.

Qansha jatqanym belgisiz. Kózimdi ashsam, aýrýhanada jatyrmyn. Medsestra Qalıqa apaı bas jaǵymda júr. Daýysy jýan edi, gúr-gúr etedi. Kózimdi qaıta jumdym.

— Aqymaǵym qaraı kór munyń, súzegen taıynshada nesi bar eken deseńshi, — dep qoıady Qalıqa apaı.

— Samat aqyldy-aq, jýas bala edi, tipti bilmeımin, — deıdi jaıdary názik ún. Táteıdiń úni. Júregim týlap ketti. Sálden keıin jumsaq qol mańdaıymdy sıpady, uzaq sıpady.

— Qalıqa apaı, mertigi joq pa? — dep surady onan soń.

— E, joǵa... . Jerge qatty jyǵylǵan, eshteńe etpeıdi...

— Osy Samat — sondaı bir jaqsy kóretin balam. Keı kezderi sabaq ústinde ózimniń týǵan inimdeı baýyryma qysqym keledi, biraq oqýshylardan yńǵaısyz kórem. Endi bul saýyǵyp sabaqqa kelgenshe, saǵynatyn bolam da...

Ia, táteı men týraly sóılep otyr. Men ushyp turyp, táteıdiń baýyryna kirip, «Táteı meni jaqsy kóredi!» — dep, aıqaı salǵym keldi. Biraq dál qazir kózimdi ashýǵa uıaldym. Tym-tyrys jata berdim.

— Bilseńiz apaı, meniń oqýshylarymnyń qandaı ekenin, tipti qımaımyn... . Bárin de jaqsy kóremin...

Men aqyryn ǵana kózimdi ashtym, táteı maǵan kúlimsireı qarap otyr eken.

---