InfoHub Logo

Keshe QR Premer-Mınıstriniń orynbasary Imanǵalı Tasmaǵambetov Parlament Senatynyń depýtattary, onyń ishinde Birǵanym Áıtimova jetekshilik etetin áleýmettik-mádenı damý jáne ǵylym jónindegi komıtettiń múshelerimen kezdesti, dep habarlady Úkimet basshysynyń baspasóz qyzmetinen.

Kezdesý barysynda áleýmettik salaǵa qatysty mańyzdy suraqtar talqylandy. Vıse-premer Imanǵalı Tasmaǵambetov atap ótkendeı, ótken jyly Parlamentke bilim, densaýlyq jáne mádenıet máseleleri boıynsha 7 qorytyndy joldandy.

Balalardy balabaqshaǵa kezekke qoıýdy jáne joldama berýdi avtomattandyrý, meketpke deıingi bilim berý nysandarynyń jelisin ulǵaıtý sıaqty mektepke deıingi bilim jáne tárbıe berý máseleleri qaraldy. Aǵymdaǵy jyly memlekettik-jekemenshik áriptestik aıasynda 41,9 myń jańa oryndar qurý josparlanyp otyr.

Sondaı-aq, orta bilim berýge qatysty apatty jáne úsh aýysymdaǵy mektepterdiń ornyna 56 nysan qurylysyn salý, 2,5,7 synyptarda jańartylǵan baǵdarlamamen bes kúndik oqý aptasyna kóshý, bitirý jáne oqýǵa túsý emtıhandaryn bólý arqyly jańa formatta UBT ótkizý suraqtary qaraldy.

Aıta keteıik, aǵymdaǵy jyly mekteptegi tamaqtaný, qural-jabdyq, kıim úlgisi, sport jáne basqa da balalardyń qaýipsizdigi, densaýlyǵy men ál-aýqatyna qatysty standarttar men erejeler qaıta qaralady.

Kásiptik-tehnıkalyq bilim salasynda «jalpyǵa birdeı tegin kásiptik-tehnıkalyq bilim» jobasyn júzege asyrý qarastyrylýda. Aldyn-ala málimet boıynsha ol 47,3 myń adamdy qamtıdy, 67 jumysshy mamandyǵy boıynsha jańa modýldik baǵdarlama ázirlenip, jańa baǵdarlamany júzege asyrý úshin 5200 oqytýshy men óndiristik oqytý sheberleri oqytyldy.  

Joǵary jáne joǵarǵy oqý ornynan keıingi bilim salasynda korporatıvti basqarý qaǵıdasy engizilip, ishki aýdıt qyzmeti qurylady. JOO-nyń uıymdastyrý-quqyqtyq formasy ózgerip, komersıalyq emes aksıonerlik qoǵamdarǵa ótedi. JOO-na memlekettik attestasıa halyqaralyq attestasıamen aýystyrylady.

Sonymen qatar, densaýlyq saqtaý salasynda áleýmettik medısınalyq saqtandyrý qory jáne onyń fılıaldaryn qurý suraǵy kóterildi. Osy jyly medısınalyq oqý oryndarynda pedıatrıa fakúlteti ashylady jáne pedıatrıa ýchaskeleri qalpyna keltirilip, óńirlerdegi barlyq emhanalarda elektrondy kezek engiziledi. Halyqaralyq standarttarǵa sáıkes kezeń-kezeńimen onkologıalyq dıspanserler bazasynda ortalyqtandyrylǵan hımıalyq preparattardy qurý kabınetteri ashylady. Sondaı-aq, dári-dármek baǵasyna regressıvti ólshem engizý máselesi qaraldy.

 

---