InfoHub Logo

Sybaılas jemqorlyqqa qarsy qoǵamdyq ombýdsmen Syrym Ábdiraxmanov mektep oqýlyqtarynyń mazmunyna qanaǵattanbaıdy.

«Endi, bilim jaǵynan birqatar jumystar atqarylyp keledi. Oǵan daý joq. Jetistikter de joq emes. Degenmen, Bilim jáne ǵylym mınıstrliginiń mektep oqýlyqtaryn daıarlaý jumysy meniń kóńilimnen shyqpaıdy. Sondyqtan meniń sybaılas jemqorlyqqa qarsy qoǵamdyq ombýdsmen retinde mınıstrge úndeý joldaý jóninde josparym bar», - deıdi Ábdiraxmanov.

Ombýdsmenniń aıtýynsha, búginde mektep jasyndaǵy balalardyń tárbıesine qatysty ıdeologıa durys júrgizilmeıdi. Al oqýlyqtardyń mazmuny kúrdeli bolǵany sonsha balamen úsh-tórt saǵat otyrýǵa týra keledi. «Soǵan meniń kóńilim tolmaıdy. Osyǵan baılanysty biz mınıstrlikpen birigip, jumys jasaýymyz qajet. Zertteý ınstıtýttarynyń basyn qosyp, bir komısıa qursaq ta bolady. Sóıtip, 1-synyptan bastap 5-synypqa deıingi oqýlyqtardyń barlyǵyna zertteý júrgizýimiz kerek. Bul - meniń jeke azamat retindegi emes, qoǵamdyq ombýdsmen retindegi ustanymym. Meniń ózimde eki bala bar. Joldasym sharshaǵanda meni kómekke shaqyrady. Sonda bárin túsindirgenshe úsh-tórt saǵat otyramyz. Bala túsinbeıdi. Ol kemistiginen emes, oqýlyqtardyń aýyrlyǵynan, kúrdeli bolǵanynan túsinbeı jatady. Ondaǵy tapsyrmalar balanyń jasyna sáıkes kelmeıdi. Eki balasy bar bizder qınalsaq, kópbalaly otbasylar ne isteıdi?», - dep atap kórsetti Ábdiraxmanov.

Aıta keteıik, Qazaqstanda qoǵamdyq daýys berý arqyly tórt qoǵamdyq ombýdsmen saılanǵan bolatyn. Olar - balalar quqyqtaryn qorǵaý jónindegi jemqorlyqqa qarsy qoǵamdyq ombýdsmen Janna Axmetova, bıznes pen qarjy-ekonomıkalyq salany qorǵaý jónindegi qoǵamdyq ýákil Denıs Krıvosheev, sybaılas jemqorlyq salasyndaǵy zańnamany saqtaý jónindegi qoǵamdyq ombýdsmen Syrym Ábdiraxmanov jáne quqyq qorǵaý men búdjet salasy qyzmetkerleriniń quqyqtaryn qorǵaý jónindegi ýákil Dına Elgezek.

Derekkóz: QazAqparat

---