InfoHub Logo

Qajymuqan jolaýshylap, aýylǵa qaıtarda, jolaı úıine bir balger jigitti erte keledi. Onymen bátýalasyp, bylaı deıdi: 

— Al, jigitim, bar sheberligińdi sal. Enemniń aty — Tákeı. Bes qyzy bar. Úlkeni — meniń zaıybym, onyń aty — Minaı. Eń kishisi on bes-on altyǵa kelip, boıjetip qaldy. Osy qyz jaıly bir habardyń shetin shyǵaryńqyrap ebin taýyp, qumalaǵyńdy sóılet. Qazir anamdy shaqyraıyn, — dep Qajekeń syrtqa shyǵyp, enesin ertip keledi.

— Qane, qulyndarym, aman-esen júr me eken, bal ashyp bere ǵoı... Bal basyń, mine, — dep Tákeı ájeı qaltasynan tıyn-teben alyp, balgerdiń aldyna qoıady.

Balger jigit óz-ózinen kúbirlep, aq oramaldyń ústine shashylǵan júgerilerge qarap otyryp, álden soń sóıleı beredi.

— Áje, bes perzentińiz bar eken ǵoı. Qazir ózińiz eń úlkeniniń úıindesiz ǵoı shamasy. Úsheýi turmysta sıaqty ǵoı... Bári aman. Biraq myna bir qumalaq jeke tur ǵoı. Eń kishińiz osy bolsa kerek. Baldyń aıtýyna qaraǵanda, kenjeńiz turmysqa shyqqan ba? Shamasy bir jetiniń ishinde shaqyrýshy kelip tur ǵoı bosaǵańyzǵa, — dep balger jigit sózin aıaqtaǵanda, Tákeı ájeı:

— Mynaý ne dep ketti, oıbaı-aý, turmysqa shyqqany nesi? Áli jas qoı. Oı, qý Qudaıym-aý, shunaq Qudaı, bul ne qylǵan is boldy? — dep jylaı beredi. Sonda tórde qısaıyp jatqan Qajekeń sylqyldap kúle jónelipti. Muny sezgen enesi kózin súrtip:

— Áı, balýan-aı, seniń-aq oıynyń taýsylmaıdy-aý. Uıqy-tuıqy bul qandaı bále desem... Qoı, balyń qursyn, balyń qursyn, — dep syrtqa shyǵyp ketipti.

---