InfoHub Logo

Sińiri shyqqan jarly kedeı, dıýana atanǵan aqyn Omar Ýátaevtyń 1932 jyly seksen jasynda qazirgi Aıakóz aýdany, Aqshataý sovhozynyń jerindegi Qyzyljalda dúnıeden kóship, Qońqaqtyń zıratyna jerlengeni belgili. Omarǵa qatysty bul áńgimedegi oqıǵa uly Oktábrden buryn bolǵan.

...Úshbıik jaqtaǵy bir baıdyń úıinde ishinde Qaziret jáne Árip aqyn bar bir top kisilikti adamdar men ıgi jaqsy atanǵandar tústenip otyrady. Dastarhanǵa qymyz ákelingende:

— Omar dıýana kele jatyr, — degen sóz estiledi.

— Qymyzdy Omar kelgen soń isheıik, — depti qaziret.

Bári de qazirettiń sózine toqtap, qymyzǵa umtylmaı sabyr etisedi. Úıde otyrǵandarǵa sálem bere kirip, tórden oryn alǵan Omardan qaziret:

— Qymyzdy ishýge bola ma? — dep suraıdy.

— İshýge bolmaıdy qymyzdy!

Osylaı dep Omardyń daýsy sańq etkende, bári de tym-tyrs bolyp, tańyrqaǵan keıipte Omarǵa qarasady.

— Qalaı? — deskenderge:

— Keshe bıe saýatyn shelekke qarala kúshik aýzyn tyǵyp alǵan, — dep senimdi túrdi jaýap qaıtarypty Omar. Surastyra kelgende Omardyń aıtqany shyn bolyp shyǵady. Osy oqıǵanyń kýási bolǵan Árip aqyn taǵy bir kezikkende Omar aqynǵa:

— El seni dıýana, bilgish deıdi, balalarymdy synap bershi, — depti. Sonda Omar Áripke balalaryn qatar qoıdyryp, bárine syn kózimen bir qarap ótedi de, Áripke qarap:

— Sóılegende ketesiń ottaı shalqyp,
Aq túıeshe kelgendi bir-aq tarpyp.
Keýdeń altyn bolǵanmen, bókseń myrysh,
Bir ózińe tartqan joq, bári shartyq, —

dep onyń balalaryna bir shýmaq óleńmen baǵa beripti.

Aıtqandaı-aq Áriptiń balalaryna aqyndyq óner darymaı, óziniń jolyn qýǵan birde-biri bolmaǵan eken.

---