InfoHub Logo

«Ózi balpaq, basy jalpaq, buty taltaq» bir Baqa kól jaǵa­syndaǵy kógalda júrgen. Ol sekire-sekire kól shetine kelip, móldir sýǵa qyzyǵa qarap otyrdy.

Sol sátte onyń aldyna Aqshabaq degen tanys balyǵy júzip keldi. Ol sýdan basyn shyǵaryp, aýzyn bir jaýyp, bir ashyp turyp:

— Salamatsyń ba, Baqataı? — dep ashyq-jarqyn amandasty.

— Sálem, Aqshabaq, sálem! — dedi Baqa da tamaǵy búlkildep, tar­bań ete bir qozǵalyp qoıyp.

— Baqataı, kesheli beri kórinbeı kettiń ǵoı, bir jaqqa bardyń ba? — dedi balyq.

— Alys eshqaıda barǵanym joq. Osy jaǵalaýdaǵy jaıylymda júrdim, — dedi Baqa.

— Jaıylymda sender osy shóp jeısińder me?

— Joq, Aqshabaq, bizder shóp jemeımiz.

— Endi ne jeısińder?

— Biz kádimgi qurt-qumyrsqa, masa-shybyn, órmekshi-qońyz, shegirtke-kóbelek sıaqty jándikterdi jeımiz. Sondyqtan da adam­dar bizdi jyrtqyshtar qataryna jatqyzady, — dep, Baqa aýzyn tamsap-tamsap qoıdy.

— Sýdan syrt jerde júrgende qatty shóldeıtin shyǵarsyń­dar, á?

— Shóldeımiz, árıne.

— Osy sender sýdy jalap ishesińder me, álde simirip ishesińder me?

— Biz sýdy jalap ta, simirip te ishpeımiz.

— Endi qalaı ishesińder? — dedi balyq.

— Syrtymyzdaǵy juqa terimizben «ishemiz». Iaǵnı ústi-basymyz jańbyr jaýyp sý bolsa da, sý ishinde júzip júrsek te, sý bizdiń denemizge teri arqyly sińedi.

— Mynalaryń qyzyq eken, Baqataı! — dep balyq oǵan ká­dimgideı tańǵalys bildirdi de, endi basqa bir jaıdy surady. — Osy biz senderdi jaz boıy jıi kóremiz de, qys mezgilinde múlde kez­destirmeımiz. Qysta sender bir jaqqa ketip qalasyńdar ma?

— Joq, Aqshabaq, biz eshqaıda ketpeımiz. Osy óz mekenimizde qystaımyz.

— Biz ǵoı qysta aq qar, kók muz qursaýlaǵan sý ishinde júre beremiz. Al sender sonda qaıda bolasyńdar?

— Biz be? Biz bir nárselerdiń astyna, inder men qýys-keýekterge kirip alyp, qımylsyz jatamyz. Qaqaǵan aıazda qatyp qalatyn kezimiz de bolady. Biraq kóktem kelip, kún jylynǵanda qaıta jandanyp, syrtqa shyǵamyz. Jerde júremiz, sekiremiz, sýda júzemiz. Ózen, kól, bulaq basynda bir-birimizge qosyla ándetip, hor aıtamyz. Mine, biz osyndaımyz, dostym.

Osy kezde bulardyń qasyna qarmaq salyp, balyq aýlap júrgen balalar kelip qaldy. Bulardan qoryqqan Baqa sholp etip sýǵa sekirdi de, balyq ta jalt berip kózden ǵaıyp boldy.

---