InfoHub Logo

Jaqsy oılaý jáne oń kózqarasta bolý. Jaǵdaıǵa oń kózqaraspen qaraý ózgelermen jaqsy qarym-qatynas qurýǵa kómektesedi jáne sýyq pen aýrýǵa qarsy kúresetin denedegi ımýndyq júıeni kóteredi. Máselen jaqsy oıda bolý úshin ózgelerdiń jasaǵan jaqsylyǵyn umytpaǵan jón. Jaman oı kele bastaǵanda dereý jaqsylyqty eske túsirý kerek.

Maqsat qoıa bilý. Alǵa maqsat qoıa bilý óte mańyzdy. Óıtkeni, adam maqsatty qalaı qoısa, ol soǵan qaraı umtylady. Maqsat bar jerde arman bar, arman bar jerde úmit bar, úmit bar jerde nıet bar, nıet bar jerde talap bar, talap bar jerde eńbek te bar. Bular — bir-birimen ajyraǵysyz, tyǵyz baılanysty qasıetter.

Salmaqty bolý. Deni saý adamǵa kúızelis pen psıhıkalyq turaqsyzdyq keri áserin tıgizedi. Sondyqtan, baısaldy bolýǵa, kúızelis, stress ataýlydan saq bolýǵa tyrysý qajet.

Jaqsy dos tabý. Keıbir dostar jaman qyrynan áser etip, paıdasynan zıanyn kóp tıgizip jatady. Ondaı dostardan alys turǵan jón. «Jaqsymen júrseń jetersiń muratqa, jamanmen júrseń qalarsyń uıatqa» degen maqal óte oryndy aıtylǵan.

Bos otyrmaý. Eń jaqsy tásilderdiń biri – «Búgingi jumystarym óte kóp!» dep aıtý. Sonda ýaqytty bos ótkizbeýge tyrysamyz. Jumystardyń tizimin quryp, kúntizbe nemese kúndelik arnaımyz. Biraq oryndaı almaıtyn jumystardyń josparyn qurmaý kerek.

Tynyǵý. Kúnniń ortasynda 1-2 saǵat uıyqtaý, unatatyn taǵam nemese jemister jeý, fızıkalyq jattyǵý jasaý, baseınge barý, serýendeý sekildi ózińe kóterińki kóńil-kúı syılaý kerek.

Kúlimdep júrińiz! Bolmashy nársege renjimeńiz. Ózgege renjigen adam basqalardy da renjitkish keledi. Qysqasy, ómirge túńilmeı, kóńildi júrińiz, sol kezde ózińizdi baqytty sezinesiz. Kim biledi, sizdiń jyly jymıǵan júzińiz ózgelerdi baqytty etýge kómektesýi ábden múmkin.

Ermekke (hobbıge) ýaqyt bólip, ózińizge raqat kóńil-kúı syılańyz! Meıli ol óner, qolóner, toptama (koleksıa) jınaý jáne t.b bolsyn, eń bastysy – ózińizdi baqytty sezinińiz. Belsendi bolyńyz, jetistikterińizdi atap ótińiz. Dostaryńyzǵa esesin dámetpesten syılyqtar berińiz. Belgili bir jumyspen aınalysýǵa, sol jumystan raqat alýǵa tyrysyńyz.

Otbasy múshelerine kómektesińiz! Ydys jýyp, úı tazalap jáne basqa da jumystarmen otbasy múshelerine kómektesińiz. Sizdiń jaqyndaryńyz sizdi jaqsy kórip qana qoımaıdy, jaqsy jumys atqarǵanyńyz úshin ózińizdi de, ózgeni de baqytty etesiz.    

Buzaqylarǵa jáne alyp-qashpa áńgimelerge mán bermeńiz! Bul árıne eń qıyn jumys, degenmen júzege asyrsańyz ıyǵyńyzdan aýyr júk túskenin sezinesiz. Keıbir kórgensizder syrtyńyzdan áńgime aıtyp jatsa, olarǵa nazar aýdarmaı, jaýap ta bermeńiz. Óıtkeni, olar erte me, kesh pe sizden kútilgen qarsy jaýapty ala almaǵan soń sharshaıdy. Ondaı adamdarmen dos bolýǵa nemese olardyń qatelikterin jóndeýge tyryspańyz, eń durysy olardan uzaq turyńyz. Kóp uzamaı renjýge turarlyq adam emes ekenin uǵasyz. Bul ózińizdi baqytty jáne senimdi sezinýge kómektesedi.

Ózińizge senimdi bolyńyz. İshki jan dúnıeńizge úńilińiz, jan sulýlyǵyńyzǵa mán berińiz. Ózińizdi jaqsy qyryńyzdan kórsetýge tyrysyńyz. Basyńyzdy kóterip, deneńizdi tik ustap júrińiz, pozıtıvti kóńil-kúımen, senimmen qadamyńyzdy nyq basyńyz.

Oqýǵa keńes beremiz:

Jaıly aımaqtan shyǵý úshin 3 sebep

Baqytqa bólenýdiń jáne árdaıym baqytty bolýdyń joldary

Ǵylymmen dáleldengen – baqytty bolýdyń 10 qarapaıym ádisi

---