InfoHub Logo

Qoshtaı jasyraq kezinde bir baı úlken toı jasaıdy. Sol mańdaǵy aýyl-aımaq erteletip toıǵa aǵylady. Qoshtaı ǵana jáı shyǵady. Ózi qyry men syryna qanyq bir aýylǵa taıaı bergende, bir jolaýshy jigitke kezdesedi. Aman-sálemnen keıin jigit óziniń mal izdegen joqshy ekenin, malyn taba almaǵanyn aıta kelip:

— Bul jaqtan eshkimdi tanymaımyn, ystyq kúnde shóldep-sharshaǵandyqtan anaý úıge túsken edim, dám tatyrmady, —  deıdi aqbozdaý úıdi jáne odan shyǵyp qasyndaǵy qarasha úıge kirip bara jatqan, qolynda urshyǵy bar kempirdi kórsetip. Bul aýyldyń árbir úıiniń jaǵdaıy ózine málim Qoshtaıdyń oıyna bir qýlyq kelip, orala ketedi de:

— Ol kisi meniń sheshem, men jalǵyz balasymyn, shesheme bala toqtamapty. Sondyqtan kóbinde qamkóńil júredi de, kelgen adamdarǵa sýsyn berýdi umytyp ketedi. Apam ózi qyzyq. Já, jigitim, oǵan renjime, menimen ilese úıge júr, — deıdi de, jigitti álgi úıge qaıta ertip barady. Úıde eshkim joq eken, Qoshtaı:

— Iapyr-aı, áıel toıǵa ketken eken, qarnyń ashqan bolar, apam kelgenshe daıyn tamaq bolsa iship-jeı otyraıyq, —  dep qazan-aıaqty aqtarystyryp júrip tulyptaǵy taryny, qaryndaǵy sary maıdy alyp shyǵady. Tary men sary maıdan aralastyryp, dastarhandy jaıyp, ekeýi jeı bastaıdy. Sońynan tegenede turǵan aırandy da ákelip quıady. Qoshtekeń qarpyna iship-jep alǵannan keıin:

— Apyr-aı, a, apam áli joq, kózdep júrgen malym bar edi, sen asyqpaı tamaqtanyp otyra ber, men tez oralamyn, — dep atyna minip zytyp beredi.

Shóldep, qarny ashqan joqshy aqpeıil, qamqor jigittiń syıly dastarhanyndaǵy tamaqty iship-jep otyra beredi.

Kórshi úıde bir shaı qaınatym ýaqyt otyrǵan báıbishe úıine kelse, manaǵy jigittiń dastarhandy jaıyp, qannen qapersiz iship-jep otyrǵanyn kóredi de:

— «Jaman úıdi qonaǵy bıleıdi» dep, qaıta aınalyp men joqta úptep otyrǵanyn qara, — dep jigittiń es-aqylyn shyǵara bajyldaıdy. Sasqalaqtaǵan jigit:

— Oıbaı, apa, álginde úıińizden attanǵan soń aýyldyń syrtynda balańyzǵa jolyqtym, ol meni qaıta ertip kelip, osy tamaqtardy aldyǵa qoıdy da, malyn kózdep ketti, — dep ózin aqtap, byjalaq qaǵady. Bul sózdi estip onan ary órshelengen báıbishe:

— Qaıdaǵy balam, ólgen balam tirilip kelip, saǵan dastarhan jaıyp tamaq berdi me? Qıqaqtama, ózińniń es-aqylyń durys pa? — dep burqyldaı beredi. Shań-shuńdy estip, kórshi úılerdiń áıelderi kelip, jigitten mán-jaıdy uǵysady jáne ózin ertip kelgen adamnyń kıimin, túr-tulǵasyn, mingen atyn surap uqqan soń osy aýyldan attanyp bara jatqan Qoshtaıdy esterine keltiredi. Bul Qoshtaıdyń qylyǵy ekenin áıelder sonda ǵana biledi.

---