InfoHub Logo

Balalar balaqtaryn túrinip, jýa terýge shyqty. Jaqynda ǵana tasqyn júrip ótken keń alqada sý tartylyp, ár jerde qaqtar jyltyrap jatqan. Kún kózi saı-salaly, toǵaıly ólkeniń ústimen bıikke kóterilip barady. Balalar shylqyldaqta balbyrap ósken jýany qýana terip júr.

— Alaqaı, men jumyrtqa taýyp aldym! — dedi Jánıa degen qyz bala aıǵaılap. Barlyǵy solaı qaraı júgirdi. Jánıa tomarshanyń ústinen alǵan sopaqtaý kógildir jumyrtqany qolyna ustap, kúlip tur. Balalardyń barlyǵy jyp-jyly jumyrtqany ustap kórip, tamashalady. Baryldaýyq úırek uzap ketpeı, tóńirektep júr.

— Jánıa, jumyrtqany ornyna sal, — dep aqyl aıtty bir bala.

— Nege?

— Kóktemde qustyń  uıasyn buzýǵa bolmaıdy. Qus óspeı qalady.

— Joq, men ony úıdegi úırekke bastyryp ósirem! — dedi Jánıa jumyrtqany artyna jasyryp.

Jánıanyń úıiniń úlken qońyr úıregi balapan basýǵa qamdanyp júrgen. Myna jumyrtqa kishirekteý bolsa da, úırek jatsynbady. Belgisiz jyljyp kúnder men túnder ótti. Bir kúni uıadan álsiz shıqyl estildi. Saryúrpek shójeler dúnıege keldi. Túz úıreginiń balapany qońyr jaǵal eken. Ana úırek úshin bótendigi joq bolatyn. Barlyǵyn jyly qanatynyń astyna aldy.

— Endi bizdiń úıde túzdiń úıregi ósetin boldy! — dep qýandy Jánıa. Balapanǵa «Baryldaýyq» dep at qoıdy, onymen dostasyp ketti.

Kúz keldi. Alǵashqy silbi qar túsken kúni Baryldaýyq aspanda tizile ushqan kóp úırekterge qarap, qatty-qatty daýystap jiberdi de, jeńil kóterilip usha jóneldi.

Ol aspanǵa qaraı órleı túsip, qanattary sýyldap, úı tóbesin jaıqap ótti. Sóıtti de túz úırekteriniń sońynan ushyp,  uzaı berdi.

Jánıa baqyryp jylap tur.

— Úıregiń kóktem týysymen qaıta keledi! — dep, anasy ony jubatýmen boldy.

---