InfoHub Logo

Jylda kóktemde bizdiń aýlaǵa qos qaratorǵaı ushyp keledi. Kelgen bette bıikte turǵan uıasyna kirip, qysta shymshyqtar salǵan qaýyrsyndar men shóp-shalamdy tazalaı bastaıdy.

— Bular byltyrǵy torǵaılar ma, joq basqa ma? — dep surady balalar birde. Men sasqalaqtap qaldym da:

— Byltyrǵylar shyǵar, — deı saldym. Ózim de anyq bilmeıtinmin. Sondyqtan bir kúni uıabasaryn ustap alyp, aıaǵyna syrǵa salyp jiberdik. Syrǵaly torǵaı balapan shyǵaryp, bir top bolyp kúzde jyly jaqqa ushyp ketti. Kóktem shyǵa bir kúni balalar úıge júgirip kirdi.

— Alaqaı, qaratorǵaılarymyz qaıtyp oraldy.

— Syrǵalysy bar ma?

— Bar, kórińizshi, áne, jaltyrap júr.

Qýanyshymda shek joq. Dándi mol tógip kútip jatyrmyz. Óz uıasyna kelgen qaratorǵaılar rahattanyp saırap jiberdi. Aýladan jyl qusynyń daýsyn estý qandaı jaqsy!  Kishkentaı balalar qaratorǵaılardy tamashalap, kúnshýaqta uzaq otyratyn boldy. Qustarmen dostasyp ketti.

Syrǵaly balapandaryn ushyrǵanda kúz tústi. Jańbyr jıi bolyp tur. Keıde qar aralasyp jaýady. Ońtústikke qa­raı qońyr bulttar jóńkip ótip jatyr. Qaratorǵaılar uzaq-uzaq sharlap qaıtady. Bir kúni Syrǵaly óz tobynda bolmaı shyqty. Torǵaılar symnyń boıynda tizilip otyryp aldy. Qatty abyrjýly. Ata torǵaı shyryldap ushyp júr. Shatyrdyń erneýine qonyp, odan ishke kirdi. Qaıta shyqty.

Shatyr astynda Syrǵaly bir qanatyn salbyratyp búrisip otyr. Topshysy synypty, tegi mysyqtyń tyrnaǵynan bosanǵan sıaqty. Qalaı ǵana qutyla aldy eken? Ony biz úıge kelgende bildik. Bir kózi aǵyp túsken sary ala mysyq peshtiń syrtynan tabyldy. Uıabasar óz ómirin erlikpen qorǵap qalypty. Biraq ońtústikke qaıtýy qıyn bolǵan. Jem men sý qoıdyq, syrttan basqalary kirip shyǵady. Biz de baqylap júrmiz.

Qys ábden taqaldy. Qustar jyly jaqqa áldeqashan ushyp ketken. Bir kúni toptasyp uzaq otyrdy. Shatyrdy aınalyp shyqylyqtap ushady. Syrǵalynyń daýsy estilse, japa-tarmaǵaı qaıta qonady.

— Tastap ketýge qımaı júr, — dedi kishkene Altyn jylamsyrap.

— Sen apańdy jaqsy kóresiń be?

— Jaqsy kórem, men ony eshqashanda tastap ketpes edim, — dedi.

Torǵaılar áli aınalyp júr. Bir sátte toptalyp alyp ońtústikke qaraı shalqı jóneldi.

— Shıq-shıq! — dedi Syrǵaly uzyn umsyǵyn kóterip. Biraq torǵaılar endi qaıyrylmady. Bultty aspanǵa sińip kórinbeı barady.

— Shıq-shıq! — dedi Syrǵaly taǵy da.

— Ketti! — dep, Altyn jylap jiberdi.

Múgedek torǵaı qatal taǵdyryna moıyn usynyp, búrisip otyr.

Biz balalarmen aqyldasyp, mamyq salǵan qaratorǵaı uıasyn shatyrǵa apardyq. Syrǵalyny mápelep kúttik. Eń sýyq aılar keldi. Jyly uıaǵa jaıǵasyp alǵan Syrǵalyǵa sýyq ta kár qyla almady. Qaýyrsyndary tirilip, ońala bastady.

Kúnder ótti, aýa raıy jylyna berdi. Aqyry kóp kúttirgen kóktem de keldi. Qar erip, alǵashqy jibek saǵym tolqydy. Ońtústikten jyly jel esip tur. Syrǵaly istik tumsyǵyn kóterip, qanattaryn qaǵyp-qaǵyp jiberdi de, tamaǵy búlkildep saırap ketti.

Ol kóktemniń rahaty men adamdardyń asqan raqymshylyǵyn damylsyz jyrlaı berdi, jyrlaı berdi…

---