InfoHub Logo

Qarlyǵash ashyq terezeden baqqa qarap otyr. Sońǵy kúnderi osylaı otyrýdy ádetke aınaldyryp alǵan. Áke-sheshesi jumysqa ketip, jalǵyz qalǵan soń, úı ishin tártiptep bolyp, sýret salýǵa kirisedi. Sýretteri de ońdy bolyp shyqpaıdy. Sebebi ǵajaıyp sýret kóz aldynda tur, soǵan qyzyǵa qaraıdy.

Aýlada baq gúldep tur. Alma aǵashtarynyń qyzyl astarly aq gúlderi jasyl dúnıeniń betine ja­ba salǵan kirshiksiz aq maqtaǵa uqsaıdy. Gúlderdi túrtkilep aralar júr. Aralar da ártústi. Barmaq basyndaı úlkeni de, qara shybyndaı kishkeneleri de bar. Yzyń-yzyń etedi. Tunyp turǵan jasyl baqta sybdyr qaǵady. Bizdeı tumsyǵyn kóterip qaratorǵaılar ne túrli áýenge salady. Gúldengen baqty baýyrymen sıpap ótip, qarlyǵashtar ushyp júr. Torańǵynyń bıik butaǵyna otyryp alyp bulbuldar saıraıdy.

Jaz qandaı ásem edi. Ásemsiń-aý, jaz! Myna bir sheksiz  aspanǵa samǵap ushar ma edi? Adamnyń qanaty nege bolmady eken? Qustar qandaı baqytty, olarda qanat bar, olar usha alady. «Shirkin, men qus bolsam!» — dep, Qarlyǵash eki qolyn qanat qylyp sermep-sermep qalyp edi, usha jóneldi. Lyp etip kóterilip, baqtyń arǵy shetinde turǵan bıik aǵashtyń ushar basyna qondy. Bul jerden búkil aýyl alaqandaǵydaı kórinedi eken. Endi aýyl ústimen qalyqtap ushyp ketti.

— Qarlyǵashty qarańdar, aspanda ushyp júr. Qarlyǵash qanat surap alypty. Tóbesine baılaǵan qyzyl bantıgi jelbirep barady! — dep shýlaıdy balalar.

— Balalar,   tamashaǵa qarańdar!   Qarlyǵash aspanda ushyp júr, — dep ózimen birge oınaıtyn kishkene qyz Qadısha da aıqaılady. Qýanyshynda shek joq. Keshe ókpelesip ajyrasqanyn da umytqan.

— O, toba, Máliktiń qyzy kishkene Qarlyǵashty qarańdar, aspanda ushyp júr! — dep úlkender de tańyrqasty.

Qarlyǵash aýyl ústimen ushyp ótti de, ózderiniń baqshasyna kelip qondy. Tereze aldyna súıep qoıǵan sary shashty qýyrshaǵyn mysyq qulatyp ketipti. Shalqasynan túsip edende jatyr. Sýret salatyn dápteri de, boıaýly qaryndashtary da shashylyp qalǵan. Bárin búldirip júrgen aq tós tarǵyl mysyq.

Qarlyǵash bolsa óziniń oıynshyqtaryn bulaı shashyp kórgen joq-ty. Dereý jınap qoıǵysy keldi. Biraq onyń qoly joq qoı. Qol ornyna qanattary bar. Qanattarymen ári-beri qarmanyp oıynshyqtaryn jınastyra almady. Qolsyz ne isteı alady? Kóp uzamaı ákesi men sheshesi túski asqa keledi. Kartop pen sábiz arshyp qoıý  kerek. Shójelerge jem shashylmapty. Jumys kóp, olardy tyndyratyn qol joq. Qol joq, qolyn qanatqa aıyrbastap jibergen.

Qarlyǵash  ushyp baryp aǵash basyna qondy Odan kádimgi qarlyǵashtarsha telegraf symdaryna otyryp aldy. Baqty aınala ushty. Qaıtyp kelip ashyq turǵan terezeden úıge kirdi, oıynshyq qyz áli jatyr. Tósek astynan tarǵyl mysyq kórindi. Sap-sary kózderin ejireıtip buǵan qarap buqpantaılap keledi. Baqshada torǵaı aýlaǵanda osylaı jerbaýyrlap jyljıtyn edi. Qarlyǵash óziniń qus ekenin, tarǵyl mysyqtyń bas salýǵa ońtaılanyp kele jatqanyn sonda bildi. Ol baqyryp jylap jiberdi.

Kózin ashyp alǵanda tereze aldyndaǵy kishkene ústelde otyr. Mańdaıy dýyldap barady. Kózin ýqalap jiberdi. Janynda kúle qarap oıynshyǵy tur. Muny mazaq etkendeı bola­dy. Sýret dápteri de, qaryndashtary da óz ornynda eken. Tarǵyl mysyq basyn baýyryna tyǵyp, pyryldap uıyqtap jatyr. Terezeden gúldegen baq kórinedi. Baq sybdyr qaǵady, qustar saırap tur. Qarlyǵash qýanyp ketti.

— Joq, men qus bolmaımyn. Eshqashanda qus bolmaımyn! — dep asúıge qaraı júgire jóneldi.

---