InfoHub Logo

Ertede ańqaý elge aramza molda bolǵan, el arasynda ózinshe «abyroıǵa» ıe bolǵan bir jalǵan áýlıe bar eken. Jurt odan bata alyp ketip júredi eken. Álgi áýlıege bir kúni jaýyryny qaqpaqtaı, mańdaıy jarty qarys, keń keýdeli, er muryndy, batyr tulǵaly bir jigit keledi. Jaýgershilik zaman eken, jigit «áýlıeden» bata suraı kelgen eken. Qorjynynyń eki basyn shymshı tikken dúnıe eken, onysyn báıbisheniń aldyna tastaı beredi.

— Qolymda naıza, belimde semser, jalǵyz ózim qalyń jaýdy qýǵaly bara jatyrmyn. Jaýym kóp, ári qarýly. Ólmeıtin, atsa oq, salsa naıza darymaıtyn etip bata berińiz,—deıdi jigit.

«Áýlıe» jaǵdaıdy túsine qalady da, ernin kúbirletip, ishinen uzaq sóılep, bata beredi.

— Ámın, — dep eki alaqanymen betin syıpaıdy, — endi ólmeısiń. Jolyń bolsyn! — deıdi.

Jigit kóp kidirmesten jol júrip ketedi. Sonda álgi áýlıeniń balasy turyp ákesinen:

— Áke, bata oqqa qalaı qalqan bola alady, óltirmes bata bola ma?—dep suraǵanda, ákesi:

— Eı, shyraǵym-aı, ólse óledi de qalady. Bata berip eń ǵoı dep ol menimen daýlasady deımisiń. Ólmeı tiri júrse, sol áýlıeniń batasymen tiri júrmin deıdi ǵoı, — degen eken.

---