InfoHub Logo

Bıyl 113 túlek BQO ákimdigi grantynyń ıegeri atandy.

Oblys ákiminiń orynbasary Baqytjan Narymbetovtiń málim etkenindeı, óńirde joǵary bilimdi, bilikti mamandarǵa qajettilikti jabý úshin jergilikti búdjet esebinen kadrlardy daıarlaý jumystary 2017 jyldan beri júrgizilip keledi.

Onyń sózine qaraǵanda, oblysta densaýlyq saqtaý, bilim berý jáne aýyl sharýashylyǵy salalary qyzmetkerlerine suranys bar.

Bıylǵy oqý jylyna oblystyq búdjet qarajaty esebinen 113 joǵary bilimdi maman daıarlaýǵa grant berildi. Sonyń ishinde 56 grant dárigerlik, 30-y muǵalimdik mamandyqty tańdaǵan túlekterge úlestirildi.

Oblys ákimdiginiń bilim berý granttary UBT nemese KT sertıfıkattarynyń baldaryna sáıkes bilim berý grantyn berý týraly kýáligine saı, konkýrstyq negizde belgilendi.

«Granttar Mahambet Ótemisov atyndaǵy Batys Qazaqstan ýnıversıteti, Jáńgir han atyndaǵy Batys Qazaqstan agrarlyq-tehnıkalyq ýnıversıteti, Q.Sátpaev atyndaǵy Qazaq ulttyq tehnıkalyq ýnıversıteti, «Nur-Múbarak» Egıpet ıslam mádenıeti ýnıversıteti, S.Asfendıarov atyndaǵy Qazaq ulttyq medısına ýnıversıteti jáne M.Ospanov atyndaǵy Batys Qazaqstan medısına ýnıversıtetine ornalastyrylyp keledi. Ár grant ıegerimen úsh jaqty kelisimshart (bilim basqarmasy, ata-ana (kámelet jasyna tolmaǵan bitirýshiler úshin), joǵary oqý orny) jasalady. Kelisimshartqa sáıkes grant ıegeri joǵary oqý ornyn aıaqtaǵannan keıin jergilikti atqarýshy organnyn joldamasyna sáıkes oblysta 3 nemese 5 jyl mindetti túrde eńbek etýi tıis», dedi B.Narymbetov.

---