InfoHub Logo

Májilis depýtaty Bekbolat Tileýhan UBT suraqtaryndaǵy  óreskel qatelikterge jol bergenderdi jaýapkershilikke tartý boıynsha Bilim jáne ǵylym mınıstrine depýtattyq saýalyn joldady, dep QazAqparat habarlaıdy.

«Búgingi depýtattyq saýalym QR Bilim jáne ǵylym mınıstri Erlan Saǵadıevke baǵyttalǵan. Bul rette Ulttyq biryńǵaı testileý máselesine nazar aýdarǵym keledi. Osy UBT-nyń tóńiregindegi álemdik tájirıbege súıengen reformanyń jalpy baǵyty qoldarlyq. Jalpy formatyndaǵy oń ózgerister barshylyq. Biraq munda basty problema suraqtyń sapasynda bolyp otyr. Bilim salasynda árbir qadamnyń negizgi kózdegen maqsatynan bólek, ıdelogıalyq baǵyty, rýhanı júgi eshqashan nazardan tys qalmaýy tıis»,-dep toqtaldy Tileýhan Májilistiń jalpy otyrysynda.

Osy oraıda ol búginde bilim salasynyń eksperıment alańyna aınalyp ketýi óte alańdarlyq qubylys ekenin atap ótti.

«Negizi, bilim salasyna qatysty birde-bir maǵlumat jaýapkershiliksiz jazylýǵa tıis emes. Óıtkeni onymen sýsyndaǵan balanyń erteńgi azamattyq ustanymyna, memleketshildigine, eljandyǵyna, tarıhı sanasynyń qalyptasýyna áser etetinin erekshe eskerý mindet»,-dep naqtylady depýtat.

Bul turǵyda Bekbolat Tileýhan jarıalanǵan  UBT suraqtary qoǵamnyń aıryqsha narazylyǵyna dýshar bolǵanyn jetkizdi.

«Test suraqtarynda Ermek Tursynov, Baıan Esentaeva, Nurtas Adambaev sıaqty jáne basqa da shoý-bıznes, estrada ókilderi júr. Búginde eldiń pikirin áleýmettik jelilerden bilýge bolady. Bul pikirlerge qarasańyzdar, shynynda da eldiń narazylyǵy joıqyn. Onda «ne úlgisi men ónegesi joq Esentaeva men Tursynovty urpaqqa úlgi qylýdan ne utamyz» dep jazǵan bir adam. Al keıbireýleri «Freddı Roýchtiń (AQSH boksshysy) qatysy qansha» dep ýájin jazǵan. Bul shynynda da bizdiń rýhanı kodymyzǵa, bolashaqqa baǵdarymyzǵa, rýhanı jańǵyrýymyzǵa qatysy bar tulǵa ma?! Jalpy, anaıy pikirlerde bar, sonymen qatar durys usynystar da jeterlik»,-dedi depýtat.

Onyń aıtýynsha, búginde test suraqtaryna engizýge laıyqty úlgi tutarlyq tulǵalar men derekter barshylyq.

«Osy kúni akademıalyq jazbalarǵa súıenbeı, ınternetten maǵlumat ala salatyn bolǵan. Ony qymsynbastan, kádege jaratýdy kásibılik dep aıtýǵa bola ma? Buqaranyń sonshalyqty narazylyǵyna sebep bolǵan,  óz isine qaýqarsyz jaýapty tulǵalar bir jaýapkershilikke tartyla ma? UBT-daǵy osyndaı óreskel qatelikter jibergen testologtar qyzmetinen bosatyla ma?  Bundaı keleńsizdikterge negizgi sebep júıeden dep oılaımyz. Sondyqtan da oqý baǵdarlamasy, oqýlyqtar men UBT-nyń júıesiniń sabaqtastyǵyn qalyptastyrý qajet. Ekinshi máselege toqtalatyn bolsaq, osyndaı asa jaýapty dúnıe qoǵamdyq talqydan ótý kerek. Elbasynyń taıaýda jarıalanǵan maqalasynda bolashaqqa baǵdar, rýhanı jańǵyrý, ulttyq kodyńdy saqtaý turǵysynda baǵdar berilip otyr. Ulttyq kodymyzǵa, rýhanı jańǵyrýymyzǵa qatysty tulǵalar týra osy jerden kórinýi (testide) kerek. Osy oraıda qoǵamdyq talqydan, jaqsy súzgiden ótkizýdi qalyptastaryp, tıisti júıeni usynýdy talap etemiz»,-dep túıindedi sózin Tileýhan.

---