InfoHub Logo

Franklınniń adamgershilik qaǵıdasy sizdi jaqsyraq bolýǵa, qıyndyqqa tótep berýge jáne kez kelgen jańashyldyqqa ashyq bolýǵa jeteleıdi.

Bendjamın Franklın 1706 jyly qarapaıym otbasynda dúnıege kelgen. Ol 12 jasynan bastap jumys istedi. Ýaqyt óte kele Franklın tabysty baspager, jazýshy, ǵalym, saıasatker jáne dıplomat boldy. Ol óz jetistiginiń basym bóligin «13 adamgershilikti» jetildirýiniń arqasynda dep biledi. Sonyń kómegimen ol kez kelgen kútpegen jaǵdaıǵa daıyn bola bildi.

Adamgershilik kartochkalary jetilýge jáne damýdyń ilgerileýin qadaǵalaýǵa kómektesedi

Franklın adamgershilik kartochkalaryn únemi ózimen birge ustap júrdi. Ol árqaısysy 7 baǵan men 13 qatardan turatyn kartochkalar bolǵan. Baǵan – kúnder, qatar – adamgershilik isteri.

Óziniń nıetin eske túsirý úshin, kúnine kartochkany birneshe ret alyp shyǵatyn. Al keshke jasaǵan adamgershilik isterin qarap, búgingi jasaǵandaryn túrtip otyratyn.

Maqsat – barynsha kóp uıashyqtardy belgilep otyrý.

Jańa apta jańa kartochkadan bastalatyn. Sonymen qatar, olardyń barlyǵy birdeı emes edi. Bendjamın 13 túrin qoldanatyn, árqaısysynyń tóbesinde qaǵıdanyń bireýi qysqasha anyqtamasymen jazylatyn. Bul degenimiz, dál soǵan osy aptada kóńil bólý kerek degen sóz edi.

Apta sońynda adamgershilik qaǵıdasynyń  qaı túriniń damyǵanyn, qaısysynyń báseńdegenin baqylady. Ómirdiń qaı salasyna jigerin kúsheıtý kerektigin oılandy. Sonymen qatar, 13 apta saıyn toqsandyq esep beretin. Bul tártiptiń oryndalýyn qadaǵalaýǵa kómek beretin.

Ýaqyt óte kele adamgershilik qaǵıdalary onyń bolmysyna, minezine aınaldy. Árqaısysyn jeke qarastyraıyq.

Franklınniń 13 adamgershilik qaǵıdasy:

Ustamdylyq

Tamaqty tek qaryn ashqanda ǵana jeńiz. Kóńil kóterý úshin nemese qomaǵaılyqpen artyq jemeńiz. Ne jep jatqanyńyzdy jaqsy qadaǵalańyz.

Kóp sóılemeý

Eger de áńgimege turarlyqtaı aıtatyn sózińiz bolmasa, úndemegen jón. Aıtqannan kóri kóbirek tyńdańyz. Bos sózge áýes bolmańyz. Tynyshtyqtyń ornyn toltyrý úshin ǵana sóıleýdiń qajeti joq. Bul adamdarmen qarym-qatynasty doǵaryńyz degen sóz emes. Tek, suhbattasýshyny jaqsyraq tanyp alǵan jón.

Tártipke degen súıispenshilik

Kerektisin tez tabý úshin, óz zattaryńyzǵa uqypty bolyńyz. Zattaryńyz tym kóp bolǵanda olarǵa qaraý qıynǵa soǵady. Bul artyq zattardan arylý kerek degen belgi dep bilińiz.

Ýaqytqa baılanysty da dál solaı isteńiz. Sonda siz mańyzdy jumystardy jasaı alasyz.

Tabandylyq

Eger bir nárseni isteımin dep baılamǵa kelseńiz, isti aıaǵyna deıin jetkizińiz. Qolyńyzdan kelmeıtin nemese jasaý tipti oıyńyzda da bolmasa, bos ýáde bermeńiz. Qolyńyzdan kelmese, ótinishti qabyldamańyz.

Únemshildik

Aqshany orynsyz jumsamańyz. Ár tıynyńyz belgili maqsatpen jumsalýy qajet. Aqsha keregińizge jarasyn. Jınap, úlken bir qajettiligińizge jumsarsyz nemese qaryzyńyzdan qutylarsyz.

Eńbekqorlyq

Ýaqytty yrdý-dyrdýmen ótkizbeńiz. Árdaıym paıdaly ispen shuǵyldańyz. Atqaryp jatqan isińizge kúshińiz jetpeı jatsa, shamańyz keletin basqa ispen aınalysyńyz. Eger de eshbir isińiz bolmasa, ózińizben jumys jasańyz. Eger tym qatty sharshasańyz, myzǵyp alyńyz. Eger sharshaǵanyńyz uzaq ýaqyt basylmasa, demalys alyńyz, ne bolmasa dárigerge qaralyńyz.

Shynaıylyq

Shynaıy bolyńyz, biraq sózińiz basqalarǵa qalaı áser etetinin de eskergen jón. Adamdy jaralamaı, kerisinshe, qanattandyrýǵa tyrysyńyz. Ótirik aıtpańyz, basqalardy da adastyrmańyz. Eger synasańyz, jumsaǵyraq aıtýǵa tyrysyńyz.

Ádildik

Óz paıdańyz úshin basqalarǵa zıan keltirmeńiz. Barlyǵyna tıimdi bolatyndaı sheshim izdeńiz.Eger sóz berseńiz, sózińizde turyńyz. Nemese sharttardy oryndaý múmkin bolmaı bara jatsa, qaıta qarastyryńyz.

Shekten shyǵyp ketpeý

Shekten shyǵyp ketpeýge tyrysyńyz. Ádette basqalarǵa degen oqys qatynas keleńsizdikke ákelip soqtyrady. Zıan  keltirgińiz kelse de, abaı bolyńyz, shekten shyqpańyz.

Tazalyq

Kıimińizge uqypty bolyńyz. Úıińiz ben jumysyńyzdy tazalyqta ustańyz. Jeke bas gıgıenasyn umytpańyz. Bul óz densaýlyǵyńyzǵa kerek, sonymen qatar, basqalardyń sizdi qalaı qabyldaıtynyna yqpalyn tıgizedi.

Baısaldylyq

Kenettten bolǵan oqıǵaǵa qamyqpańyz. Odan qashyp qutyla almaısyz, qaıǵyrýmen de sheshim tappaıtynyńyz anyq. Óz emosıańyzdy ustaı bilińiz, jáne júris-turysyńyzǵa keri áserin tıgizýine jol bermeńiz. Ol jaıtty durys sheshimge kelýge septigin tıgizetin habar retinde qabyldańyz.

Páktik

Qumarlyq – ómirińizdiń máni bolýynan saqtanyńyz. Ózińizdi satqyndyqqa ıtermeleýge jol bermeńiz. Eger jalǵyz ózińiz tótep bere almasańyz, kómekke júginińiz. Biraq bul qaǵıdadan múldem bas tartýǵa da bolmaıdy.

Keńdik

Kez kelgen iste asyp túsýge tyrysyńyz. Keremetpin dep maqtanýdyń esh qajeti joq. Jaı ǵana artyǵymen isteýge jáne ózgeniń haqysyn berýge tyrysyńyz.

Bul júıeni ómirde qalaı qoldanamyz?

Franklınniń adamgershilik qaǵıdalaryn negizge ala otyryp, ózińizdiń boıyńyzdan kórgińiz kelgen qasıetterdi qosa otyryp, kesteńizdi quryńyz. Nemese ózińizdiń qalaýyńyzsha basqadaı tizim jasap alyńyz.

Negizgi oı – sizdi jaqsyraq bolýǵa septigin tıgizetin izgi is pen ıkemniń júıesin qalyptastyrý. Keıin kúndelikti ózińizdiń ilgeri basqanyńyzdy qadaǵalaý.

Ýaqyt óte, bul qasıetter sizdiń bolmysyńyzǵa aınalady. Bastysy – kúndelikti jattyǵý. Kartochkalardy qaǵazǵa túsirip alyńyz nemese smartfonyńyzǵa engizip qoıyńyz. Kúnde tańerteń kartochkaǵa qarap, sol kúngi atqarylatyn jumysty esińizge salyp otyryńyz. Keshke ne istegenińizdi túrtip otyryńyz. Al apta sońynda jalpy ilgerileýińizge baǵa berińiz.

Tek, birden keremet nátıje kútpeńiz. Oı-óristi damytý ýaqytty talap etedi. Kúndelikti qaǵıdalarmen júretin bolsańyz, ómirińizdiń jaqsy jaqqa qaraı ózgergenin ańǵaratyn bolasyz.

---