InfoHub Logo

Pılottyq joba Astana, Almaty men Qaraǵandy qalalarynda qolǵa alyndy. Árbir qalada 25 muǵalim, jalpy 75 mektep oqytýshysy hımıa, fızıka, bıologıa men ınformatıka pánderin aǵylshyn tilinde túsindirýge úırenedi. Olar úshin arnaıy baǵdarlama jasaldy. Bilim jáne ǵylym mınıstrliginiń osy tapsyrysyn Professional development centre alyp otyr, dep habarlaıdy QazAqparat.

Atalǵan ortalyqtyń departament dırektory Aıda Ýrazaeva tapsyrystyń naqty somasyn ashqan joq. Alaıda oqýǵa túsken 75 muǵalimdi 2,5 aıdyń ishinde aǵylshyn tilinde erkin sóıleýge, tipti jazýǵa úıretip shyǵamyz dep otyr.

«Osy ýaqyttyń ishinde úsh qalada bilim alatyn muǵalimder kúnine tórt jarym saǵat aǵylshyn tilin úırenetin bolady. Barlyq sabaqtar tek sol tilde ǵana ótedi. Pılottyq joba úshin biz arnaıy baǵdarlamany daıarlap shyqtyq. Muǵalimder sol baǵdarlama boıynsha til úırenetin bolady. Shyny kerek, bastapqyda olardyń tarapynan bir qorqynysh boldy. Alaıda qazirgi kezde olardyń boıynda kádimgideı qulshynys, tildi úırenemin degen maqsat anyq baıqalady», - deıdi A.Ýrazaeva.

Departament basshysynyń sózine qaraǵanda, muǵalimderdiń tizimin mınıstrlik bilim berý basqarmalarynyń usynysy negizinde ázirledi. Olardyń barlyǵy - hımıa, fızıka, bıologıa men ınformatıka oqytýshylary. Ázirshe, aǵylshyn tilin bilmeıdi. Jeltoqsan aıyna deıin olar Starter, ıaǵnı bastapqy kezeńnen bastap, A1-A2-V1 sıaqty satylardan ótýi tıis. Al kýrstyń sońynda olardyń daıyndyqtaryn táýelsiz mamandar baǵalaıdy. 

---