InfoHub Logo

QR Bilim jáne ǵylym mınıstri Ashat Aımaǵambetov suhbaty áleýmettik jelide keńinen taraǵan kókshetaýlyq muǵalimmen kezdesý bolǵanyn aıtty.

«Ol muǵalimmen kezdestik, biraz áńgimelestik. Jalpy, kóp suraqtaryna jaýap berdik. Negizinen, muny júıeli túrde qarastyrý kerek, tek bir muǵalimniń máselesi emes, ıaǵnı bul jalpy ustazdardyń máselesi. Buny Elbasy da, Memleket basshysy da kóterdi. Osy oraıda tıisti tapsyrmalardy berilip, qajetti qarjy bólinip jatyr. Sondyqtan bizdiń aldymyzda júktelgen tapsyrmany tıimdi oryndaý mindeti tur. Zań jobasyn Parlament qabyldaıtyn bolsa, ony iske asyramyz», - dedi mınıstr tilshiler saýalyna jaýap bere otyryp.

Budan bólek, mınıstr pedagogtardyń mártebesine baılanysty zań jobasynda biraz máseleler qarastyrylǵanyn atap ótti.

Eske sala keteıik, jaqynda QR Bilim jáne ǵylym mınıstri Ashat Aımaǵambetov áleýmettik jelide taraǵan kókshetaýlyq muǵalimniń daýly suhbaty jóninde pikir bildirgen edi.

«Dostar! Sońǵy kúnderi tarıh pániniń muǵalimi A.K.Ahetovanyń vıdeosuhbaty keńinen taralyp jatyr. Atalǵan rolıkte kóterilgen máseleler qoǵam tarapynan qyzý talqylanýda. Dál qazir bul materıaldyń mazmunyna qatysty eshqandaı baǵa bermeımin. Eń bastysy, kez kelgen muǵalim men ata-ana óz pikirin ashyq bildirýge quqyly ekenin túsiný - mańyzdy, al bizdiń mindetimiz - osy usynystar men eskertýlerdi nazarǵa alý», - dep jazdy mınıstr Feısbýk jelisindegi resmı paraqshasynda.

---