InfoHub Logo

Bilim jáne ǵylym mınıstri Erlan Saǵadıev Máskeý memlekettik ýnıversıtetiniń rektory Vıktor Sadovnıchııdiń «Qazirgi joǵary bilimdi bakalavr men magıstr dep ekige bólip, Bolon úderisine qosylǵanymyz durys bolmady» degen pikirimen kelispeıdi. Reseıdiń rektorlar odaǵynyń prezıdenti óz elindegi joǵary bilim berýdi burynǵy besjyldyq júıege qaıta aýystyrýdy usynyp otyr. E.Saǵadıevtyń aıtýynsha, Qazaqstanda ol jaǵynan eshqandaı ózgerister bolmaıdy.

«Men ózim elimizdiń Bolon úderisine qosylǵany qate boldy dep sanamaımyn. Qalaı bolǵanda da, bilim berý salasyndaǵy xalyqaralyq ıntegrasıanyń bolashaǵy zor. Eger memleketter qandaı da bir júıege qosylsa, onda bizge de oǵan qosylyp beıimdelýge týra keledi. Sebebi xalyqaralyq ıntegrasıasyz 30 damyǵan memlekettiń qataryna qosylý múmkin emes. Sosyn negizgi másele bilim berýdiń formasynda emes, onyń mazmunynda, oqý baǵdarlasynyń sapasy durys bolsa, merzimin keltirýge bolady. Bolon prosesi bola ma, adam úsh jyl oqı ma, tórt jyl oqı ma, ol mańyzdy emes. Sebebi adam ómir boıy bilim alyp jatady. Al sol bilimniń mańyzdy degen baǵyttaryn neǵurlym tez meńgerseń, soǵurlym saǵan degen suranys joǵary bolady. Bylaısha aıtqanda, adam alǵan bilimdi is júzinde qoldana bilýi kerek. Osy másele mańyzdy. Sondyqtan álem elderi bilimniń formasy jaǵynan bir júıeni qabydasa da, bilimniń mazmunynda shek joq. Árkim ony barynsha tıimdi etip beıimdeýge tyrysady». - dedi Saǵadıev QazAqparat tilshisine bergen suxbatynda.

Aıta keteıik, jaqynda Máskeý memlekettik ýnıversıtetiniń rektory Vıktor Sadovnıchıı «Reseıdiń Bolon úderisine qosylyp, joǵary bilim berý salasyn tórtjyldyqqa aýystyrǵany qate boldy» dep málimdegen.

Onyń aıtýynsha, Eýropa elderi atalǵan standartqa aýysýdyń aldynda bilim berý salasyn rettep aldy. Al Reseıde tıisti jumysty atqarmaı jatyp, jańa júıege aýysa saldy. Sonyń saldarynan ýnıversıtet pánderi jalpylama bolyp ketti. 2010 jyly Qazaqstan da Bolon deklarasıasyna qosyldy.

---