InfoHub Logo

QR Bilim jáne ǵylym mınıstrligi elimizdiń 6 joǵary oqý ornynda tekserý júrgizdi.

«2019 jylǵy 16-30 qyrkúıek aralyǵynda QR Bilim jáne ǵylym mınıstrligi tarapynan elimizdiń 6 joǵary oqý ornynda profılaktıkalyq baqylaý júrgizildi: Ó.A.Baıqońyrov atyndaǵy Jezqazǵan ýnıversıteti, akademık Q.Sátbaev atyndaǵy Ekibastuz ınjenerlik-tehnıkalyq ınstıtýt, M.Tynyshpaev atyndaǵy Qazaq kólik jáne komýnıkasıalar akademıasy, D.Qonaev atyndaǵy Eýrazıa zań akademıasy, «Turan» ýnıversıteti, Qazaq eńbek jáne áleýmettik qatynastar akademıasy. Nátıjesinde atalǵan joǵary oqý oryndarynyń bilim berý qyzmetinde ártúrli dárejedegi buzýshylyqtar anyqtaldy. Profılaktıkalyq baqylaý qorytyndysy boıynsha belgili bolǵan sáıkessizdikterdi joıý jáne bilim berý qyzmetin zańnama normalaryna sáıkes keltirý boıynsha JOO-ǵa usynymdar berildi, biraq ákimshilik sıpattaǵy sharalar qoldanylǵan joq», - delingen habarlamada.

JOO qyzmetin taldaý qoldanystaǵy normatıvtik quqyqtyq aktilerge sáıkes júrgizilgen. Profılaktıkalyq baqylaý barysynda bilim berý uıymdarynyń qyzmeti men oqýǵa qabyldaýdyń úlgilik erejeleri, biliktilik talaptary jiti tekserildi.

«Anyqtalǵan buzýshylyqtardy joıýǵa berilgen merzim óz shegine jetkennen keıin, mınıstrlikpen sáıkessizdikterdi joıýdy baqylaý boıynsha qaıta tekserý júrgiziletin bolady. Bilim berý salasyndaǵy zańnama talaptarynyń buzylý faktisi qaıta anyqtalsa, JOO-ny bilim berý qyzmetin júrgizýge lısenzıadan aıyrý boıynsha materıaldar sot qaraýyna jiberiletin bolady»- dep habarlady baspasóz qyzmeti.

---