InfoHub Logo

(Ustazdar kúnimen oqýshynyń quttyqtaýy)

Qurmetti ustazdar men oqýshylar! Jyl saıyn jyl qusyndaı bolyp aınalyp soǵar ustazdar merekesi taǵy da esik qaǵyp tur. Ustaz mamandyǵy qaı qoǵamda da, qaı zamanda da qadirli de qurmetti bola bildi. Óıtkeni ustazdyq - tek búginniń ǵana emes, keleshektiń, bolashaqtyń jemisin mápeleýshi ulaǵatty is. Kúni keshe ǵana mektep esiginen tarydaı bop kirip, aqyl darıasy tolysyp taýdaı bop shyǵar árbir shákirt - osy bir kıeli mamandyqtyń aldynda máńgi qaryzdar. Sebebi "Esimde álippeni jattatqyzyp, eń alǵash qolǵa qalam ustatqanyń" dep belgili án joldarynda aıtylǵandaı, bilim kemesi mektep tabaldyryǵynan attaǵanda, kúlimsireı qarsy alyp, qolyńnan jetelep partańa ákep otyrǵyzatyn alǵashqy ustazyńnan bastap, árbir ǵylym syrynyń negizderin jalyqpaı úıreter joǵary synyp ustazdarynyń barlyǵy da shákirt júregine óz izin qaldyryp úlgeredi.

Keń baıtaq respýblıkamyzdyń kúlli ustazdary merekelep jatqan osynaý ustazdardyń kásibı merekesi - Muǵalimder kúni merekesi de bizdiń altyn uıamyz bop sanalar mektebimizde atalyp ótilip otyr. Dál osy kúni mektep ujymy ǵana emes, barsha oqýshy qaýymy da osynaý merekege yqylastana den qoıýda. Bálkim, dál osy kúni mektep qabyrǵasynda bilimmen qarýlanyp, izetti tárbıe kórip júrgen biz ǵana emes, keshe nemese odan arǵy jyldarda da osy mektepti támamdap, bul kúnde ár shalǵaıda ózine júktelgen ómir júgin arqalap júrgen túlekter de óz ustazdaryn eske alǵan shyǵar. Búgingi mektep ómirine etene aralasyp júrgen bizder de sol túlekterimiz sekildi ustazdarymyzdy erekshe qurmetteımiz. Óıtkeni, qurmetti ustazdar, bilim nárimen sýsyndatyp, jyly sózderińizben demep, bolashaq dep atalatyn aspanı álemge jetelep aparar - tek sizdersizder. Múmkin sizderdiń ulylyqtaryńyz da osynda jatqan shyǵar. Sizder bizdiń jasaǵan árbir úlgili isterimizben maqtansańyzdar, biz de óz ustazdarymyzdyń ustazdyq qasıetterimen maqtana alamyz. Shákirt júregine tek qana izgilik nuryn seýip, erteńgi bolashaǵymyzǵa degen qajetti tildermen ana tilimizden kem sýsyndatpaı júrgen, tehnıka, aspan álemi, tabıǵattyń ózimen etene syrlastyryp, qupıasy mol qyzyqty pánderdi jalyqpaı úıretip júrgen ustazdarymyzben qalaısha maqtanbaspyz. Maqtanarmyz da, qurmettermiz de olardy.

Bala shaqtan mápelep,
Bolashaqqa jetelep,
Ustazdardyń arqasy
Bassaq qadam tótelep.

Oń-solyńdy tanytqan,
Shertip shejire tarıhtan.
Uǵyndyrsa ustazym,
Tyńdaýdan men jalyqpan.

Ótse ózińde kóktemim,
Bilim nárin tókkeniń.
Ystyqsyń sen barshaǵa,
Altyn uıam - mektebim.

Ustazdarym, asylym,
Mereıleri tasyǵyn.
Bere bilgen shákirtke
Bilimniń bar asylyn.

Qosylyp tilek tilekke,
Kóbeısin, kelsin bereke.
Qutty bolsyn, ustazym,
Kásibı osy mereke!

Qurmetti ustazdar! Sizderdi osynaý kásibı merekelerińizben shyn júrekten quttyqtaımyz. Sizderdiń otbasylaryńyzdyń berekeli, ujymdaryńyzdyń merekeli, kóńilderińizdiń shýaqty, densaýlyqtaryńyzdyń qýatty, isterińizdiń altyn, júzderińizdiń jarqyn bolýyna, júrekterińizge nur, qadamdaryńyzǵa gúl bitýine shyn júrekten tilektespiz. Ár ýaqytta shákirt qurmetine bólene berińizder. Mereke taǵy da qutty bolsyn, qymbatty ustazdar!

---