InfoHub Logo

Búgin Astanada QR Premer-Mınıstriniń orynbasary Imanǵalı Tasmaǵambetovtiń qatysýymen joǵary oqý oryndarynyń basshylary laýazymyna úmitkerlerdi anyqtaý boıynsha Respýblıkalyq konkýrstyq komısıanyń otyrysy ótti.

Otyrys barysynda Respýblıkalyq komısıa músheleri usynylǵan qujattarmen tanysyp, konkýrs qatysýshylarymen suhbat júrgizdi. Onda úsh ýnıversıtettiń rektory laýazymyna úmitkerler irikteldi. Atap aıtqanda, Qaraǵandy memlekettik tehnıkalyq ýnıversıteti, İ. Jansúgirov atyndaǵy Jetisý memlekettik ýnıversıteti jáne Pavlodar memlekettik pedagogıkalyq ınstıtýtyna jańa basshylar tańdaldy, dep habarlaıdy Premer-Mınıstrdiń orynbasary hatshylyǵy.

Barlyq úmitkerler joǵary bilimi, 5 jyldan kem emes basshylyq laýazymda jumys ótili bar, sondaı-aq, JOO damytý baǵdarlamasynyń bolýy jaǵynan qoıylyp otyrǵan talaptarǵa sáıkes keletinin atap ótken jón. Sapalyq quramy jaǵynan baıqaýǵa bilim jáne ǵylym júıesiniń 26 ókili qatysty (16 ǵylym doktory, 8 ǵylym kandıdaty).

Úmitkerlermen suhbat jáne olar usynǵan JOO damytý baǵdarlamasyn talqylaý nátıjesinde Respýblıkalyq konkýrstyq komısıa Qaraǵandy memlekettik tehnıkalyq ýnıversıtetiniń rektory bos laýazymyna taǵaıyndaýǵa Marat Ibatovty, İ. Jansúgirov atyndaǵy Jetisý memlekettik ýnıversıtetiniń rektory laýazymyna Qýat Baımyrzaevty jáne Pavlodar memlekettik pedagogıkalyq ınstıtýtynyń rektory bos laýazymyna Altynbek Nuhulyn taǵaıyndaýdy usyndy.

Eske sala ketsek, aǵymdaǵy jyldan bastap Qazaqstanda memlekettik JOO-nyń rektorlaryn taǵaıyndaý erejesi ózgerdi. Endi jańa talaptarǵa sáıkes rektorlardyń taǵaıyndalýy ashyq konkýrs negizinde júrgiziledi. Buǵan deıin memlekettik joǵary oqý oryndarynyń rektorlary QR Bilim jáne ǵylym mınıstriniń jeke sheshimimen taǵaıyndalyp keldi.

Buǵan deıin habarlanǵandaı, bul jańashyldyq qazaqstandyq joǵary oqý oryndarynyń basqarý quramyn sapaly basshylarmen toltyrý jáne basqarý derbestigin ulǵaıtý, sondaı-aq, qoǵam aldyndaǵy eseptilikti kúsheıtý qajettiginen týyndap otyr.

Aǵymdaǵy aıdyń qazan aıynda JOO-nyń baqylaýshy keńesteriniń otyrystary ótkizildi, onda úmitkerler usynǵan oqý ornyn damytý baǵdarlamalary qaraldy. Onyń qorytyndysynda JOO-nyń baqylaýshy keńesteri qupıa daýys berý arqyly Respýblıkalyq komısıa qaraýyna usyný úshin kandıdattardy anyqtady. 

---